Beldurgarria izango da Kalabazaren Bidea
Ate joka da Gau Beltza, beste urte batez. Gero eta gehiago dira Kalabazaren Bidearekin bat egiten ari diren eragileak.
Kalabazaren Bidea, Gau Beltzaren barruan Errenteria-Oreretan. Gau Beltza antolatu du aurten ere Orereta Ikastolak. Ez da bakarrik aritu, ohi bezala, herriko hainbat eragilerekin elkarlanean ondu du herriko txokoak beldurrez beteko dituen festa: Lau Haizetara Euskaltzaleon Topagunea, Amulleta Danborraren Kofradia, Herri Arte Eskola, Urdaburu Mendizale elkartea, Xenpelar AEK, eta Gaztañoko auzo elkartea. Beste bi eragile batu dira aurten: Koldo Mitxelena ikastetxea eta Koldokide guraso elkartea.
Santa Klara kaletik abiatuko da 19:30ean Kalabazaren Bidea, eta herriko hainbat kale zeharkatuta, ordubetera Agirre Lehendakariaren plazan bukatuko da sorpresaz betetako bidea. Kalabazaren gurdiarekin, Kuiandererekin, trikimako gaineko orekariekin, dantzaz zein musikaz eta kriseilu nahiz lastargien argipean egingo dute, mozorrotuta, uzta garaia agurtu eta neguan sartzeko Kalabazaren Bidea. Ibilbidean zehar, hainbat txokotan, emankizunak ikusteko aukera izango da, baita bukaeran ere, Agirre Lehendakariaren plazan.
Horiek bukatuta, suzko zezenaren jirabirekin Beldurraren Eltzean izuak erre bitartean bukatuko da festa.
Hilaren 31n, ostiralarekin, egingo dute Gau Beltza, eta herritar orori egin diote gonbidapena parte hartzeko. Horretarako hainbat modu proposatu ditu Orereta Ikastolak. Kalabazaren bidea eginez. Horretarako etxeko trapu eta arropa zaharrekin mozorrotuta joateko eskatu dute ahal dela.
Beldurrak paper batean idaztea da beste aukera, festaren amaieran Izuen Eltzean erretzeko. Etxea eta ingurua apaintzea ere balekoa da; kalabazekin, kriseiluekin, oihal zuriekin. Azkenik, ingurukoak festan parte hartzera gonbidatzea da beste aukera. Zazpigarrenez, Beldurrezko mikroipuin eta ikus-entzunezkoen lehiaketa antolatu dute Gau Beltza eta Euskararen Eguna (abenduak 3) lotzeko, gainera. Horretan parte hartzera ere deitu dute (klik hemen)
Ondoko bideoa Orereta Ikastolarena da.
