Kritika eta umorea erruz, txirigota jaialdian
Bi Kolorete Kultura elkarteak antolatuta, 11. Cadizko Inauteri Jaialdia izango da larunbatean Lekuona Fabrikan.
Gartzia eta Atxukarro gaur jaialdia aurkezteko agerraldian.Herri Bizia Goi mailako ikuskizunak hartuko du Lekuona Fabrika larunbat arratsaldean. Hala esan dute gaur Bi Kolorete Kultur elkarteko Josu Atxukarrok eta Maite Gartzia Kultura zinegotziak. Izan ere, Cadizko Inauteri Jaialdia egingo dute, eta 11. ekitaldiak inauterien sorlekutik zuzenean txispa, umore eta musikarik onena ekarriko duela iragarri dute Atxukarrok eta Gartziak. Hori horrela, 11. edizioan lau txirigota ariko dira oholtza gainean. Los calaita aurtengo Cadizko inauterietako taldeen lehiaketa ofizialeko lehen saria eskuratu du eta ikuskizun nagusia izango da.Umore beltza, interpretazioaren originaltasuna, eta letren ausardia nabarmendu dituzte, baita Eugenio umorista omentzen duela ere.
Konpromiso sozial dosia emango dio Los Muchachos del congelao txirigotak emanaldiari. Cadizko Inauterietako Taldeen Lehiaketa Ofizialean laugarren sailkatu zen, eta egunerokotasunarekin lotutako gaiak landuko ditu, samurtasunaren eta mezu sotilen bidez. Una chirigota con ShonikEt3 txirigotak, freskotasuna, gaztetasuna eta giro ona ekarriko duela azaldu dute. Azkenik, Aqui donde me veis por una chispa no soy rey erromantzea ariko da. Bigarren saria jaso zuen bere modalitatean eta kaleko inauteriaren ahotsik jatorrena eta egiazkoena ekarriko omen du satira politikoaren eskutik.
Errenteria-Orereta Cadizko Inauteriaren Jaialdiaren “bihotza” dela jarri du nabarmen Atxukarrok, “azaroaren 1 askoren egutegian dago markatuta, eta aurten ere kalitate goreneko ikuskizuna ekarriko dugu, barrez eta emozioz betea”. Sarrerak agortuta daude, eta 500 pertsonek izango dute jaialdiaz zuzenean gozatzeko aukera. Sarrera lortzerik izan ez dutenentzat zuzenean emango dute streaming bidez Tele Donostiko Youtube kanaletik eta LTD bidez.
Harrera udaletxean
Aizpea Otaegi alkateak eta udalbatzako hainbat kidek harrera egingo diete txirigotetako ordezkariei udaletxeko areto nagusian larunbatean, eta bertan izango da Udal txistulari Banda eta dantzariak ere agurra eskaintzeko. Bertako harrobiari egin dio Atxukarrok erreferentzia,, izan ere, jaialdiak hori sustatzeko helburua ere ba omen du, “Koldo Mitxelena ikastetxeko 11 urteko hiru ikasle taldek hasiko dute ikuskizuna, euskara hutsean egin eta interpretatuko duten txirigota pieza batekin, “kulturen fusioa eta etorkizuneko proiekzioa sinbolizatuz”.
Larunbateko Errenteria-Oreretako ekitaldi nagusiaz gain, Berrozarren eta Hondarribian ere izango dira emanaldiak.
