Lezoko bidegorri sarea hobetzeko, hiru proposamen egin dizkio Eguzkik udalari
Eskaerek egungo sarea hobetzea, eta mugikortasun arloko segurtasuna nahiz jasangarritasuna sustatzea dute helburu.
Altzateko bidegorri zatira joateko zatia estutu dela azaldu du Eguzkik.Eguzki 
Ondoko panela nahasgarria dela uste du Eguzkik. Argazkia: Eguzki.
Eskaera izaerako hiru proposamen helarazi dizkio Eguzki talde ekologistak Lezoko Udalari, herriko bidegorrien sarea hobetzeko, eta horietan mugikortasuna seguruagoa eta jasangarriagoa izan dadin. “Uste dugu udalak horietatik bi betearazi behar dituela. Hirugarrena, beste alternatibarik ezean, kontuan hartzeko modukoa da”.
Udalak “betearazi” beharrekoen artetik lehena, bide-seinaleekin du harremana. Zehazki, Gi-636 errepidearen gaineko Altamirako biribilguneko pasabidean udalak aspaldi jarri zuen bide-seinaleekin zehazki. Eguzkiren aburuz, han den Pasaia-Donostia norabidera bideratzeko seinaleak ematen duen informazioa ez da zuzena, bizikletaren zaleak Gi-636 errepidearen paraleloan den oinezkoen bidera eramaten baititu: “Izan ere, tarte hori ez dago bizikleta-planaren barruan (aldundiak berretsi du) eta, gainera, bidegorri baten gutxieneko baldintzak betetzetik oso urrun dago, are gehiago bizikletek eta oinezkoek partekatzen badute eta norabide bikoitzekoa bada. Horregatik, lehenbailehen kentzeko eskatzen dugu, baldintza horiek betetzen ez dituen espaloi-tarte estu bat bidegorri gisa erabiltzera bultzatzen baitu”.
Udalaren bigarren betebeharra, Eguzkiren ustez, Renfeko geltokitik Altamirako biribilguneraino doan zatiarekin du zerikusia. Han, zehazki Altzateko etxebizitza eremura iristeko egindako biribilgune berrian, Gipuzkoako Bizikleta Planean ezarritako sare nagusiaren trazaduraren neurriak ez dira betetzen, bidegorria estutzen delako. “Gainera, obrekin bidegorriaren zati bat eten egin zen, baina gaur egun ez dira leheneratu. Gure idazkian eskatzen dugu beharrezko neurriak har daitezela egungo trazaduraren baldintzak (gutxieneko zabalera) mantentzeko eta trazaduraren jarraitutasuna leheneratzeko”.
2013an onartu zen Gipuzkoako Bidegorri Sare Nagusiarekin du harremana hirugarren proposamenak, bigarren eskaerarekin lotura duena. Lezon bada tarte bat bi bidegorri adarren artean loturarik ez dagoena, Altamirako biribilgunearen inguruan. Horren gaineko gogoeta egiteko eskatu diote udalari, “tarte horretan sareari jarraitutasuna eta koherentzia emanez”.
Altamirako biribilgunearen aurreko maldan, etena dago bidegorria. Argazkia: Eguzki.
