Etxez etxeko langileen aldarrikapenei erantzuna eman die gobernu taldeak: "Ez da bidezkoa udala egitea egoera honen errudun"
Udal gobernuak azaldu du martxoan adostu zuela etxez etxeko langileekin eta sindikatuekin haien egoera hobetzeko konpromisoa, baina langileek eta enpresaren arteko akordiorik egin ezean, konpromiso hori ezingo dela egikaritu.
Greba mugagabean dira Pasaiako etxez etxeko langileak. Bi hilabete egingo dituzte protestarako lan etenaldi iraunkorrarekin, euren lan baldintzen aldeko borrokaldian. Pasaiako Udalak langileekin eta sindikatuekin aurtengo martxoan adostutako hobekuntzak zerbitzua azpikontratatua duen Matia-Goxararekin negoziatzen hasi, eta negoziazio horien blokeoa iritsi zen, ez zen udalak, sindikatuek eta langileek eskutik landutako proposamenarekin hitzarmenik egiterik izan; langileen ustez, enpresa horrek bere etekinerako nahi zituen hobekuntza horiek. Orain, langileek, udalean jarri dute fokua, euren “prekarietate egoeraren” arduradun egiten dute udal erakundea, eta zerbitzua publifikatzeko desio eta beharra azaldu dute, bai zerbitzuaren erabiltzaileentzat zein langileentzat onena delakoan. Udal gobernu taldearentzat ez da bidezkoa haren kontrako akusazio eta presio bide hori: “Ez da bidezkoa udala egitea egoera honen arduradun. Beharrezkoa da enpresak eta langileek hitzarmen bat sinatzea, etxez etxeko laguntza zerbitzuaren lizitaziora proposatutako diru gehikuntza bideratu ahal izateko. Hori ezinbesteko baldintza da diru hori zuzenean langileen soldata eta balditzetan islatuko dela bermatzeko. Eta horretarako modu bakarra da konpromisoa hitzarmenean sinatzea, enpresak eta langileek”.
Hitzarmen hori Matia-Goxarak eta langileek sinatu behar dute. “Horregatik guztiagatik, ezin dgu onartu azken asteotan zabaltzen ari diren mezi bidegabe eta okerrak, udala egoera honen arduradun moduan aurkezten dutenak”.
Pasaiako Udal Gobernuaren ustez langileen aldarrikapenak “guztiz legitimoak eta beharrezkoak” dira, “hasieratik izan dugu garbi sektore feminizatu eta zaurgarri horretako langileek baldintza duinagoak, egonkortasuna, eta lanaren aitortza behar eta merezi dituztela. Gobernu honek haien eskaeren alde egin du hasi eta buka”. Horregatik, martxoan landutako proposamenean %12ko soldata igoera urte bakarrean; zerbitzuaren 3.300 orduko gehikuntza erabiltzaileen arreta denbora eta langileek kontratuak luzatzeko; prestakuntza espezifikorako tresnak (euskara ikastaroak tartean); eta zerbitzua publifikatzeko aukera aztertzea ziren adostasunaren oinarrian. Publifikazioaren aldeko apustua berretsi du udal gobernuak, eta bide horretan zerbitzua udalaren menpeko zuzenean izan dadin bideragarritasun ekonomiko azterketa egingo duela ziurtatu du. “Baina gogoratu behar da, Toki Administrazioaren Arrazionalizazioari eta Iraunkortasunari buruzko Legeak publifikaziorako baldintza zorrotzak ezartzen dituela, eta, beraz, posible balitz ere, inolaz ere ezingo dela izan prozesu berehalakoa ezta gaur egungo egoerari behar duen premiazko erantzuna emango diona”.
“Argi utzi beharra dago, gainera, konpromiso horiek langileekin aurrez negoziatutakoak eta etxez etxeko langileek nahiz euren ordezkari sindikalek onartu eta babestutakoak zirela. Udalak, beraz, bere eskuetan zeuden urrats guztiak egin ditu, langileen eskariak aintzat hartuz eta ekonomikoki posible den hobekuntza oro bermatuz”, adierazi du udal gobernuak publiko egin duen adierazpenean.
Lizitaziora atera berri du udalak zerbitzua, sei hilabeteko epekoa. Xehetasun gehiago eman ditu Aintzane Taberma Gizarte Ekintzako zinegotziak: “Bi aldeek hitzarmen hori sinatzea lortu ez zutelako, udalak ezin izan zuen aurreko lizitazioan igoera ekonomikorik gehitu, ez baitzuen modurik bermatzeko diru gehikuntza hori enpresak ez zuela bere etekinera bideratuko, langileen baldintzetan inolako arrastorik utzi gabe. Hala ere, udalak erabaki zuen lizitazio hori 6 hilabeteko epearekin kaleratzea, ohi bezala 2 urterako deitu beharrean, urte erdiko marjina emanez bi aldeek akordio bat erdietsi eta hitzarmena sinatzeko, eta hartara, hurrengo lizitazioan aipaturiko hobekuntzak txertatzeko”.
Urtebete lanean
Martxoan publiko egin ziren konpromiso horiek egikaritzeko udal gobernua etenik gabe lanean izan dela adierazi du Tabernak, azken urtebetean haren lan-ildo nagusiena izan dela azaldu du, eta gobernuak ahal izan diren mekanismo guztiak baliatzen saiatu dela zehaztu du martxoko konpromiso horiek langileengana iristeko. “Uste dugu udalaren kontrako kanpaina hau erabat bidegabea dela. Ez da bidezkoa ahalegin eta gardentasun handiz lan egin duen erakundea egoera honen erantzule moduan seinalatzea. Pasaiako Udalak bere esku zegoen guztia eta gehiago egin du; orain enpresaren eta langileen ardura da akordioa sinatzea, Pasaiako herritarren mesedetan. Eta gu prest gaude, eta egongo gara, lehen egunetik adierazi dugun moduan, bide horretan langileak akonpainatzeko”.
Taberna kontziente da langileak ezinegon betean direla, “ulergarria da haien haserrea eta ezinegona. Are gehiago, legitimoa da eta guztiz babesten dugu suren borroka. Baina ez da bidezkoa udala egitea egoera honen errudun. Udalak lehen momentutik jarri du mahai gainean langileek onartu zuten soluzioa, eta ezin dugu gehiago egin gure eskumenetik harago. Benetan sinesten dugu konponbidea posible dela, baina hori ez dago udalaren esku bakarrik: enpresak eta langileek sinatu behar dute akordioa. Udalak prest jarraitzen du, baina bide bakarra elkarrizketa eta akordioa dira, eta gure partetik hori aspaldi jaso dute etxez etxeko langileek”.
Langileak, berriz ere udalbatzarrean
Iraileko udalbatzarrean egin bezala, urrikoan ere etxez etxeko zerbitzuko langileak udalbatzarrean izan ziren. Asteartean egin zen zinegotzien osoko bilkura. Hitz egiteko tartea hartu zuten, azaltzeko haien ustez duela hilabetetik udalak euren egoera konpontzeko ez duela aurrera urratsik egin. Honakoa esan zuen langileen eledunak: “Argi geratu da, zaintza zerbitzua, enpresaren logikan uzteak kalte egiten diola zerbitzuari; ondorioz, kaltea herritarrei eta langileei egiten zaie. Langileak prekarietatean daude. Eta egoera honen aurrean udalak azpikontratatzen duen zerbitzu hau nola ematen jarraitu nahi duen erabaki beharra dauka”.
Erabaki politikoak har ditzatela eskatu zieten langileek aurrez aurre zituzten zinegotziei. “Prest zaudete, behar diren erabaki politikoak hartzeko, zuen ardura kontutan izanik, pairatzen dugun arrakala gainditzeko? Gauden prekarietatetik irteteko? Jasaten dugun diskriminazioa alde batera uzteko? Hori horrela gertatu dadin, erabaki politiko batzuk hartu behar dira. Eta hori zuei dagokizue, mahai horretan esertzen zareten guztiori. Zuena da ematen duzuen zerbitzuaren ardura. Zein eredu lehenetsi nahi duzuen. Beraz, eskatzen dizuegu, arduraz jokatu dezazuen, eta egoera honen konponbidea bideratu dezazuen. Irailaren 1etik greba jarrai batean gaude, prekarietatetik ateratzeko determinazioz gaude, argi dugu hau konpondu arte ez garela geldituko”.
