Presio sozial eta indartsu bateratua eskatu du Duintasunak
Abenduaren 18an manifestaziora deitu du Euskal Herriko Pentsiodunen Mugimenduak Gasteizen Herri Ekimen Legegilean eskatu duena berma dezaten.
Duintasunaren azaroko lehen asteleheneko protesta.Imanol Saiz Gomez de Segura Ez dute asko eskatzen, zahartzaro duin baterako eskubidea bermatzea baino ez. Eskaera horrekin irten dira kalera berriro Duintasunak deituta dozenaka pentsiodun eta protesta handi baterako deia zabaldu. Manifestaziora deitu du EHPM Euskal Herriko Pentsiodunen Mugimenduak gaurko protestan; Gasteizen izango da abenduaren 15ean. Xedea, herritar eta eragile mordoren babesa jaso zuen HEL Herri Ekimen Legegilean eskatzen zutena, bizi baldintza duinak bermatuko dituzten miseriazko pentsioen osagarria. Legebiltzarrak ez zuen tramitera onartu, baina Euskal Herriko Pentsiodunen Mugimenduak adierazi du eutsi egiten diotela pentsioen osagarri bat eratzeko eskaerari, eta 2026an martxan izatea nahi dute gainera.
Ez daude amore emateko prest, hala adierazi dute gaurko mobilizazioan, “hitz egiteko eta aurrera egiteko aukerarik badago, gurekin konta dezakete. Bizi baldintza duinak lortu ezin dituzten adineko pentsiodunen arazoa onartezina eta luzaezina da eta diotenez, funtsean ados bagaude, hori posible egiteko moduak bilatzea derrigorrezkoa da”.
Ildo beretik, EAJ eta PSE-EE beste bide batzuk “aztertzeko” prestu azaldu zirela aipatu dute pentsiodunek HELaren bidez eskatutakoari erantzuteko, 2026rako aurrekontu publikoetan gutxieneko pentsioak osatzeko partida bat bideratzeko aukera dute, baina beldur gara ez ote duten partidarik proposatuko haien alde egiteko”.
Datuak eman dituzte ondoren. Hala Araba, Bizkai eta Gipuzkoako aurrekontuak %4 handituko direla aurten azaldu dute, 16.400 milioi eurora helduko direla, “baina beste behin ere, diru sarrerak, soldata errenten kontura izango dira batez ere: %86. Pertsona Fisikoen Errentaren gaineko Zergaren bilketa %10 igoko da eta beste horrenbeste BEZaren bilketa, baina 14 urte bere horretan izan den Sozietateen Gaineko Zerga %14 jaitsiko da”. Azken horrekin, oso kritiko Duintasuna, “aurrekontu handienak direla esango dute, baina EAEn pobreziak gora egiten jarraitzen du”.
Lanbide Arteko Gutxieneko Soldatari ere erreparatu diote gaurko protestan. Sindikatuen Herri Ekimen Legegilea blokeatuta geratzeaz gain, Confebaskek eta CENek patronalek “erabat arbuiatu” dutela azaldu dute pentsiodunek.
Testuinguru horretan gizarte mobilizaziorako topagune bateratuen beharra aldarrikatu du Duintasunak, pentsiodun, sindikatu eta bestelako eragileen elkarlana bermatzeko, “batetik pairatzen ari garen jarrera antidemokratikoak salatzeko, eta bestetik, gutxieneko pentsio eta gutxieneko soldata duin eta nahikoak exijitzeko”.
Batzarra bukatuta, manifestazioa egin dute pentsiodunek Herriko Plazatik abiatuta; geldialdia egin dute Iztietako anbulatorioaren aurrean, osasungintza publikoaren defentsa egiteko, eta hortik bidea jarraitu dute Herriko Plazan bukatzeko.
Ondoko bideoa eta argazkiak, Imanol Saiz Gomez de Segurak eginak dira.
-
- Duintasunaren protesta, azaroko lehen astelehenean.
-
- Duintasunaren protesta, azaroko lehen astelehenean.
-
- Duintasunaren protesta, azaroko lehen astelehenean.
-
- Duintasunaren protesta, azaroko lehen astelehenean.
