Bi kontzertu eta diana bat, txistu doinuz
Hilabete honetan ere emanaldiak eskainiko ditu Udal txistulari taldeak; Baserritarren azokaren udazkeneko jaian ariko dira, eta Santa Zezilia eguneko kontzertua ere ondu dute.
Udal Txistulari Taldea auzoak eta herriko txokoak musikatzen eta girotzen arituko da hilabete honetan ere. Larunbatean izango dute lehen hitzordua, berezia gainera; izan ere, baserritarren azokaren udazkeneko jaia egingo dute egun horretan eta txistulariek Erdiguneko kaleak girotuko dituzte eta ondoren, 10:00etan Jose Erbiti kalean ariko dira azoka berezia girotzeko.
Hurrengo hitzordua, hilaren 23an izango dute, musikarien egun handian, Santa Zezilia egunean diana eta kontzertua egingo ditu txistulari taldeak. 09:30ean izango da diana Erdiguneko kaleetan barrena; kontzertua berriz, Xabier Olaskoaga plazan izango da 12:00etan hasita eta ez dira bakarrik ariko, Herri arte Eskolako perkutsio ikasleekin eta herriko beste hainbat txistularirekin ariko baitira.
Kontzertu horretarako egitarau zabala ondu dute parte hartzaileek. Hala, Bapo bapo, Txistularien kontrapasa, Iparragirreren bi zortziko, Oihartzunak, Errenderiarra, Errenderikoa, Gurpil jokoa, Oskorriren bilduma eta amaitzeko, Santa Zeziliako biribilketa joko dituzte.
Kontzertuaren aurretik, Xenpelar Bertso Eskolako kideek emanaldia eskainiko dute.
