Juan XXIII kaleko igogailua konpontzen ari da udala
Motorra aldatu behar dute, eta piezak hilaren 24an iritsiko dira. Igogailua egun horretan bertan martxan jartzea aurreikusi du udalak.
Urrian Donibaneko Juan XXIII kaleko igogailuaren matxuraren abisua jaso zuen Pasaiako Udalak, eta hura konpontzeko lanetan hasi zen. Hasiera batean, errodamenduetan arazoak zeudela uste zuen konponketa lanez arduratzen den enpresak, baina horiek aldatu ondoren, matxura handiagoa zela ikusi zuten.
Hori dela eta, igogailuaren motorra aldatu behar izan dute, eta makina berezia denez, piezak jasotzeko epea luzea dela jakinarazi du udalak, epe horiek murrizten saiatu bada ere. Pieza berriak hilaren 24an iritsiko direla adierazi du udalak, eta konponketak hasi eta egun horretan bertan igogailua martxan jartzea aurreikusi da. Jarduketa horiek 16.075,27 euroko kostua izango dute.
