Osasun mentala, ongizate emozionala eta auto zaintza erdigunean
Iratxe Etxebarria eta Maitane Ormazabalek emango dituzte hitzaldiak; hilaren 18an eta 25ean izango dira hitzaldiak, udaletxeko pleno aretoan.
Maitane Ormazabal terapeuta, Instagrameko irudi batean. @ikuxka / Instagram Nerabezaroan zein heldutasunean osasun mentalaren zaintzak duen garrantzia azpimarratu nahi du Arraztalok, eta, horretarako, bi hitzaldi antolatu ditu datozen egunetarako. Iratxe Etxebarria eta Maitane Ormazabal izango dira hizlariak, hurrenez hurren, eta saioetan nerabe eta helduen osasun mentala nolakoa den ulertzeko gakoak emango dituzte adituek.
Etxebarriak laneko estresaren inguruan hitz egingo duela aurreratu dute Arraztalokoek, eta, beraz, auto zaintzaren inguruan sakonduko dutela. Ormazabalek, alabaina, nerabeen osasun mentalean eragina duten faktoreak jorratuko ditu “gazteei gertatzen ari zaien hori hobeto ulertu ahal izateko”.
Etxebarria komunikatzailea, coach-a eta Neke profesionalaren sindromean (burnout) da aditua, eta berak bizitako krisi baten esperientziatik abiatuta 7.300 miligramo eszitalopram liburua idatzi zuen. Bertan, osasun mentalari, ongizateari eta zaintzari buruzko gogoetak bildu ditu, eta gaur gaurkoz laneko estresak duen eraginaz sentsibilizatzeko ahaleginean dabil. 7.300 miligramo eszitalopran zertarako? Norberaren ongizatea eta auto zaintzari begira hitzaldia hilaren 18an (asteartean) izango da.
Ormazabalek, bestalde, Nerabeen bidelagun. Osasun mental eta emozionala nerabezaroan hitzaldia emango du hilaren 25ean (asteartea da). Psikologoa eta hezkuntza zein osasun emozionalaren arloan da espezialista, eta psikologiaren munduan dihardu formakuntza, terapia, komunikazio eta dibulgazio lanetan. Nerabeen Garrasia liburua idatzi du Telmo Lazkanorekin, eta bertan nerabeen artean ugaritzen ari diren osasun mentaleko arazoen testuingurua aztertzeaz gain arazo horiek ulertzeko tresna praktikoak ematen dituzte.
Bi saioak udaletxeko pleno aretoan izango dira, 18:30ean.
