27. Ikuska, hilaren 14tik 22ra
Udalak eta Trintxer Kulturalak prest dute Ikuska Pasaiako badiako Film Laburren Erakusketa. Orotara, 67 film labur proiektatuko dituzte.
Beste urtez batez, hemen da Ikuska Pasaiako badiako Film Laburren Erakusketa. Aurtengoa zikloaren 27. ekitaldia izango da, eta hilaren 14tik 22ra bitartean lurreratuko da Pasaian eta Oarsoaldean. Orotara, 67 film labur proiektatuko dituzte aurten (programa osoa jaialdiaren webgunean kontsulta daiteke). Ikuska Pasaiako Udalak eta Trintxer Kulturala elkarteak antolatutako film laburren erakusketa da, eta hainbat herrialdetako zinemagileek hartzen dute parte. Aurten, esaterako, Frantziako, Belgikako, AEBetako, Boliviako, Brasilgo, Erresuma Batuko, Txileko eta Portugalgo zinemagileak arituko dira Ikuska-n.
Atal ofizialaz eta lehiaketatik kanpoko film laburrez gain, Ikuska-k euskara eta hizkuntza bizikidetza sustatzen dituen Mintzagun atala izango du berriz ere. Atal horren baitan, euskarazko zenbait film labur proiektatuko dira Errenteria-Oreretan, Lezon eta Oiartzunen, hilaren 17tik 20ra bitartean. Saioetako batzuk irekiak izango direla aurreratu dute antolatzaileek; beste batzuk, ordea, euskaltegietako ikasleei begirakoak izango dira.
Sustatzaileek jakinarazi dute aurten ere Emea eta Askotarikoa atala nabarmenduko dela. Atal hori Bekoz Beko elkartearekin batera sustatzen dute, eta genero berdintasuna eta feminismoa aitortzen ditu. Emea eta Askotarikoa-n bost film labur proiektatuko dira. Aurreko ekitaldietan bezala, ez dira faltako film labur dokumentalaren saioa eta Gauguasa umorezko film laburren proiekzioa.
Gipuzkoako Foru Aldundiaren eta Mintzagunen babesari esker, Ikuska-k 6.000 euro banatuko dituela adierazi dute antolatzaileek. Sari banaketa ekitaldia hilaren 22an izango da, Trintxerpeko Alkateordetzan, 19:00etan. Sari horiek zazpi kategoriatan banatuko dira, honakoak:
- Ikuska 2025eko film labur onenari: 1.500 euro.
- Interpretazio onenari: 1.000 euro.
- Animazio film labur onenari: 500 euro.
- Ikusleen saria: 500 euro.
- Mintzagun saria: 1.000 euro.
- Emea eta Askotarikoa saria: 1.000 euro.
- Gazteen saria: 500 euro.
Ordezkarien adierazpenak
Teo Alberro, Pasaiako alkatea: “Ia hiru hamarkada hauetan zehar, jaialdi honek konpromiso sendoa erakutsi du kulturarekin eta sorkuntzarekin, Pasaiako bihotzean errotutako topagune bihurtu da, eta mundua beste ikuspegi batetik ezagutzeko aukera eman digu ikus-entzunezko film laburren bidez. Urtez urte, Ikuska-k nazioartean gero eta proiekzio handiagoa du. Hala ere, urte hauetan guztietan ez du alde batera utzi bere tokiko izaera”.
Isaac Palencia, Gipuzkoako Foru Aldundiko Gazteria eta Kultura Sustapeneko zuzendaria: “Ikuska bezalako erakusketek kultura zinematografikoaren bizitasuna erakusten dute, bai eta gure lurraldeko sortzaileen eta ikusleen arteko lotura indartzeko duten gaitasuna ere. Gipuzkoak kultura hurbil eta parte hartzailea behar du, eta horretan funtsezkoa da udalerrietan egiten den lana. Pasaiako Ikuska jaialdia, urte askotan zehar, laborategi paregabea izan da, non ikus-entzunezko sorkuntza eta hizkuntza aniztasuna elkar elikatzen diren, eta horrek gure kultur sistemari aberastasuna ematen dio”.
Laura Ré Pasaiako Kultura zinegotzia: “Ikuska-k ez ditu urte hauetan guztietan bere sustraiak ahaztu: aniztasunari, hizkuntza bizikidetzari eta berdintasunari egiten dien ekarpenak geroz eta konprometituagoa izaten jarraitzen du. Gainera, Mintzagun atalak euskararen erabilera eta harrotasuna sustatzen ditu. Gazteen sariak bertan kokatzen ditu nerabeen ahots kritikoak. Eta Emea eta Askotarikoa aitorpenak, hain beharrezko diren emakumeen ahotsa eta genero perspektiba kokatzen ditu beste behin kulturaren lehen lerroan. Edizio honetan ere, Pasaiak munduari irekitako leiho bat izango du berriz ere, kulturaren eta zinemaren bidez”.
Kike Santiago, Trintxer Kulturalaren ordezkaria: “Ikuska-k fikziozko istorioak eta istorio errealak kontatu nahi ditu, harremanak izateko ditugun moduei buruzko begirada partekatu, ezagutu eta zabaltzeko. Eskerrak eman nahi dizkiegu film laburrak egiten dituzten pertsona guztiei; haiek gatazka pertsonal eta sozialei buruzko begirada jasotzen dute, eta aretoetara joaten diren ikusleen gogoetak eragiten dituzte”.
