Arropa truke azoka egingo dute ostiralean, Labore Oarson
Hilaren 21ean izango da, 17:00etan hasita. 'Kontsumismoaren aurrean eraiki ditzagun alternatiba jasangarriak' lelopean egingo dute azoka.
Ostiral honetan (hilak 21) Arropa truke azoka egingo dute Labore Oarson, lehenengoz. “Kontsumismoaren aurrean eraiki ditzagun alternatiba jasangarriak” lelopean egingo dute jarduera, eta edonor bertaratu badaiteke ere, zenbait arau zehaztu dituzte truke horretan partu hartu nahi dutenentzat.
Eman dituzten xehetasunen artean daude, esaterako, barruko arropa, bainujantziak, oinetakoak edota osagarriak ezingo direla trukatu; are, egoera onean dauden jantziekin baino ezingo da trukerik egin. Ildo horretatik, beraz, Laborekoak azpimarratu dute “zuk trukean hartuko zenituzkeen jantziak” eramateko. Era berean, zehaztu dute pertsona bakoitzak gehienez bost jantzi eramateko aukera izango duela.
Parte hartzaileek jantziak entregatzean tiketak jasoko dituzte beste batzuekin trukatzeko: oinarrizko kamiseta batekin txartel bat jasoko dute, gainerako kamiseta eta galtzekin hiru txartel, eta, azkenik, beroki, anoraka, soineko edota petoekin bost txartel jasoko dituzte. Txartel horiekin bakoitzak gustuko dituen beste jantzi batzuk trukean hartzeko aukera izango du. Aurreratu dute jantziak probatu nahi dituenentzat txokoren bat egiten ahaleginduko direla.
Trukatu gabe geratzen diren txartelak hurrengo arropa truke azoka erabiltzeko aukera egongo dela jakinarazi dute, baina, aurreratu dute aurretik Oreretako Emausen dendan ere erabilgarriak izan daitezen adosten saiatuko direla. Izan ere, trukatu gabe geratzen diren jantziak Emaus Gizarte Fundazioari emango dizkiote dohaintzan.
Azokaren egunean bertan Oiartzungo hezkuntza zentroetan ehungintzaren gaia lantzen ari diren DBH3ko ikasleen laguntza izango dute.
Azoka 17:00etan hasiko da, eta 20:00ak arte egongo da martxan, eta tarte horretako edozein momentutan joan daiteke parte hartuz jantziak trukatzera. Gainera, jakinarazi dute norbere jantziak hasieran entregatu daitezkeela eta arratsaldeko edozein unetan erabili daitezkeela txartelak. Ez dago, beraz, dena jarraian egin beharrik.
