Pasaiako babesleku klimatikoak identifikatu ditu udalak
Udalak herriguneko azpiegitura berdearen identifikazioa eta bero boladen aurrean herritarrak babesteko neurriak hartzeko helburua du. Prozesuaren nondik norakoak ostegunean aurkeztuko dituzte, San Pedron.
Pasaiako Udalak azpiegitura berdearen eta babesleku klimatikoen identifikazio prozesua abiatu zuen 2024ko uztailean. Udalak klima aldaketaren eraginei aurre egiteko konpromisoa du, eta hainbat ekintza gauzatu ditu azken urteetan. Horien artean dago Pasaiako Klima eta Energiaren Tokiko Planaren idazketa, 2023an egindakoa. Ekintza plan horren barruan, hainbat helburu ezarri zituen udalak, honakoak: herriguneko azpiegitura berdearen identifikazioa eta bero boladen aurrean herritarrak babesteko neurriak hartzea.
Pasaiako azpiegitura berdearen eta babesleku klimatikoen sarearen proiektuaren baitan, udalerrian konfort termikoa eskain dezaketen eremuak identifikatu dituztela jakinarazi du Iraitz Pazos Ingurumeneko zinegotziak. Horiek identifikatzearen helburua bero boladen aurreikuspenen aurrean herritarrak babestea dela baietsi du udal hautetsiak. Eremu horiek kanpoaldekoak (herriko eremu berdeak, parkeak edota lorategiak) eta barnealdekoak (liburutegiak, kiroldegiak edota kultur etxeak) dira.
Udalak ez du bidea bakarrik osatu, eta “garrantzia handia” eman die herritarren iritziei. Horretarako, parte hartze prozesu sakona egin du udal erakundeak. Udalak proiektua aurkeztu die Pasaiako hainbat eragileri, eta herritarrek aukera izan dute identifikatutako eremuei buruz duten iritzia emateko eta proiektuari ekarpenak egiteko. Hauexek dira parte hartu duten eragileak: Pasaia-Lezo Lizeoa, Berdintasun Mahaia, barruti guztietako jubilatuen elkarteak eta herritarrak saio irekietan. Horrez gain, udalak gaiari buruzko online galdetegi bat argitaratu zuen udal webgunean, pasaitar guztiei begirakoa.
Proiektua bukatzeko, pasaitarrei zuzendutako saio bat antolatu du udalak. Topaketa ostegunean (hilaren 20an) izango da, San Pedroko Udal Aretoan, 18:30ean. Udal erakundearen xedea da prozesuaren nondik norakoak azaltzea eta Pasaiako babesleku klimatikoen sarea herritarrei aurkeztea. Jarduera hau Aldaketaren Marea egitasmoaren barrukoa da.
