Baserritarren jantziekin jantzi dituzte erakusleihoak
Herrian oihalak eta artilea saldu, eta ikastaroak eskaintzen dituzten lau denden erakusleihoetan baserritar jantziak jarri ditu Iraultza Dantza Taldeak-Jantziaren Zentroak.
Baserritar jantziak Tejemaneje txokoan.Jantziaren zentroa Herrian oihalak eta artilea saldu, eta ikastaroak eskaintzen dituzten lau denden erakusleihoetan baserritar jantziak jarri ditu Iraultza Dantza Taldeak-Jantziaren Zentroak. Zazpi baserritar jantzien erreplikak dira, sei emakumezkoenak eta gizonezkoen bat. Jantzien alboan nongoak diren, argazki zein jantzi baten erreplikak diren zehazten duen kartela, eta jatorrizko argazkiak ere ikusgai daude. Iraultza Dantza Taldea-Jantziaren Zentrotik azaldu dutenez, baserritar jantziaren berreskurapenaren alde egiten ari diren proiektuaren barruan kokatzen da euren lana herriko erakusleihoetara eramatea.
Halaber, keinua egin diete tokiko saltokiek eta bertan erostera deitu herritarrak, “baserritar jantzia egin nahi duen orori, gure herriko dendetan beharrezko oihala, artilea, haria… erosi, eta bertako merkataritzaren aldeko apustua egitea bultzatu nahi dugu”.
Lau dira proiektu honetan gurekin bat egin, eta euren erakusleihoa utzi diguten dendak, Tejidos Amy, El rincon de Pituca, Tejemaneje txokoa eta Blazmo Sormenezko Mertzeria.
Tejidos Amik 1974. urtean zabaldu zituen ateak Errenteriako Martin Etxeberria kaleko 6 zenbakian. 2017. urtean egungo jabeak hartu zuen dendaren ardura. Oihal dendaz gain, joskintza proiekturako bezeroak behar dituen gomendio eta oihal aproposak topatzeko laguntza eskaintzen da bertan. El rincon de Pitucak, berriz, 2016an zabaldu zituen ateak Xenpelar kaleko 4. garren zenbakian. Mertzeria, oihal eta artile salmentaz gain, joskintza, kakorratz-lan eta puntu-lan tailerrak eskaintzen ditu. Tejemaneje txokoa, 2019an zabaldu zuten Santxoenea kaleko 1 zenbakian. Artile denda izateaz gain, kakorratz-lan eta puntu-lan tailerrak eskaintzen ditu. Blazmo Sormenezko Mertzeria, azkenik, 2019an sortua Nafarroako etorbidearen 28. zenbakian dago. Mertzeriako produktuak, oihal eta artilea saltzen dute bertan, eta horrez gain, joskintza, kakorratz-puntu, puntu-lan, brodatu eta patchwork ikastaroak eskaintzen ditu.
