'Ametsak garaipen' lelopean egin dute Kirolaren Gala
250 lagunek hartu zuten kirola eta kirolariak aitortzeko gala horretan, eta Ane Santestebani omenaldi berezia eskaini zion udalak, ekitaldiaren barruan.
Kirol Galaren lehen irudia.Herri Bizia Kirola eta kirolariak izan ziren atzo arratsaldean protagonistak, errenteriako Kirolaren Galan. Ametsak Garapen leloarekin, 250 lagun inguruk hartu zuten parte ekitaldian. Errenteria-Oreretako hainbat klub, kirolari, erakundeetako arduradun eta Aizpea Otaegi alkatea, Leire Mazizior Kirol zinegotzia, Maite Gartzia, Elixabete Murua eta Isaac Palencia zinegotzia izan ziren gala horretan. Errenteria-Oreretako kirola zoriondu zuen alkateak, “gero eta anitzagoa eta inklusiboagoa den komunitate bat sortzeagatik”, eta euren ametsak segitzera animatu zituen denak.
Hainbat kirolari eta klub agertokira igo ziren lortutako ametsak partekatzeko batzuk; etorkizunerako dituzten erronkak eta ametsak azaltzeko besteak. Oholtzan izan ziren ondokoak: Ibai Isasa, Gipuzkoako eta Euskadiko igeriketa txapelduna; Mai Linh Vu, Urtzi Letamendia eta Anderson Batista, Kenthai Fight taldekoak; Alaine Gonzalez eta Jule Araneta, 15 urte besterik ez dituztela, Club Txuri Urdin izotz hockeyko txapeldun direnak; eta Nerea Orena, Hibaika Arraun Elkartekoa, 17 urte baino gehiago kirol gogor hori jokatu duena.
Ereintza Elkarteko, Oarso Boley Taldeko, Marpex Beraun Mahai Teniseko eta Otxe Txirrindularitza Elkarteko ordezkariak ere igo ziren oholtzara.
Errenteriako Udalak omenaldi berezia egin zion Ane Santesteban txirrindulariari, bestalde, atzoko ospatutako kirolaren gala horretan.
Santesteban ia 17 urtez izan da emakumezkoen txirrindularitzaren erreferentea. 2013an Espainiako txapelduna izan zen, eta maiz jokatu da nazioarteko itzuli handietan. Bere irmotasunak, ahaleginak eta lidergoak adin guztietako kirolarientzat eredu bihurtu dute Santesteban. Errenteriako Udalak omenaldia egin nahi izan dio, ez bakarrik errepidean izan dituen lorpenengatik, baita bere konpromisoagatik, jarraikitasunagatik eta belaunaldi berriek beren ametsak grinaz eta dedikazioz jarraitzeko inspirazio izateagatik ere.
Errenteriako Herri Arte Eskolako Ballet eta Antzerki taldeek ere parte hartu zuten ekitaldian.
Galarekin Errenteriako Udalak bere babesa adierazi nahi die herriko kirol erakundeei, izan ere, Aizpea Otaegik adierazi zuen bezala, “kirolak gizartea aldatzeko eta batzeko ahalmena du”.
