Atzerritartasun Arautegia, hizpide Pasaian
Udalak Atzerritartasun Arautegi berria sakon aztertzeko informazio saio batzuk antolatu ditu: hilaren 27an Donibanen eta abenduaren 16an Trintxerpen.
Pasaiako Udalak Atzerritartasun Arautegi berria sakon aztertzeko informazio saio batzuk antolatu ditu. Lehen hitzaldia Antxon izan zen, urriaren 22an. Urtea bukatu baino lehen beste bi saio egingo dira: hilaren 27an Donibaneko kulturguneko balio anitzeko gelan eta abenduaren 16an Trintxerpeko Alkateordetzan, biak ala biak 19:00etan. Saio horietan atzerritartasunaren eta migrazioaren arloan jasotako aldaketa esanguratsuenak jorratuko dituzte. Sarrerak doakoak dira, aretoetako edukiera bete arte.
Udalak jakinarazi du hitzaldietan “argi eta erraz” azalduko direla aplikatu diren aldaketa nagusiak. Atzerritarrei buruzko arautegian Espainiako atzerritarren egoitza, lana eta erregularizazioa arautzen direla baietsi du udal erakundeak, eta arautegi horretan 2024an aldaketa nabarmenak sartu zirela gaineratu du.
Araudi berria 2025eko maiatzaren 20an sartu zen indarrean, eta honakoak dira helburuak: izapideak sinplifikatzea, legeria Europako arauetara egokitzea eta integrazioa hobetzea lan, prestakuntza eta familia arloetan.
Arautegian izan diren aldaketak Pasaian bizi diren migratzaileei, erregularizazio prozesuan daudenei edo migratzeko asmoa dutenei nola eragin diezaieketen azalduko diete. Horretarako, SOS Arrazakeria elkarteko hizlariak izango dira saioetan. Horiek atzerritartasun zuzenbidean espezialistak dira, eta haien helburua da zalantzak argitzea eta araudi berrietara egokitzeko orientazio praktikoa ematea.
