Bost arlotan hamalau zuzenketa aurkeztu dizkio EAJk aurrekontuari
Elixabete Murua Mindegia bozeramaleak azaldu du jeltzaleen zuzenketa sorta, eta horien helburua, gobernu taldeak 2026rako aurkeztutako udal aurrekontu proiektuari, "anbizio falta zuzentzea, aurten detektatutako beharrei erantzutea, eta datorren urteko kontuak udalerriarentzat benetako eraldatze tresna izango direla bermatzea".
Elixabete Murua bozeramaile jeltzalea erdian, Luis Mari Oiarbide eta Jaione Francorekin. Aurrekontu proiektuari zuzenketa sorta aurkeztu dio EAJk. Zehazki, bost arlotan hamalau zuzenketa dira eta gaur eman du horren berri EAJk goizean egindako agerraldi bidez. Elixabete Murua Mindegia bozeramaleak azaldu du jeltzaleen zuzenketa sorta, eta horien helburua, gobernu taldeak 2026rako aurkeztutako udal aurrekontu proiektuari, “anbizio falta zuzentzea, aurten detektatutako beharrei erantzutea, eta datorren urteko kontuak udalerriarentzat benetako eraldatze tresna izango direla bermatzea”.
Mugikortasuna, irisgarritasuna eta espazio publikoarekin lotuta, zortzi zuzenketa aurkeztu dituzte jeltzaleek. Lehena, Lartzabalgo autobus geltokia, hirugarren hariko obrek ezabatutako geralekua irisgarritasun irizpideetara egokituta berriro jartzeko 40.000 euroko diru zatia da. Bizikleta aparkaleku estaliak sortzea da beste proposamena, bi zehazki: bata Galtzaraborda auzoan, eta bestea Erdigunean, eta horretara 100.000 euroko diru zatia bideratu dute. Urbanizaziorako diru zatia sendotzea ezinbestekoa ikusten dute halaber, eta aurreikusitakoari 50.000 euro gehitzea proposatu dute. Asfaltatzeari ere erreparatu diote, eta horri 150.000 euro bideratzea proposatu.
Igantziko irisgarritasun integralarekin ere kezkatuta azaldu dira EAJkoak, eta haren gaineko azterketa egiteko 20.000 diru zatia proposatu dute. Banakako ur kontagailuak instalatzeko diru laguntzetara 100.000 euroko bideratzea eskatu dute, bestalde, “beharrezkoa baita etxebizitzek banakako kontagailuak edukitzea tasa progresiboa izan dadin eta diru sarreren arabera ordaintzeko”. Hiri altzariei bideratutako partida handitzea ere proposatu dute eta horretara 50.000 euro bideratu dituzte. Azkenik, LED argiteria instalatzen segitzeko 75.000 euroko diru zatia jaso dute euren zuzenketan, “urratsak egin ditu udalak bide horretan, baina oraindik ere badira LED argia ez duten auzoak, eta uste dugu garrantzitsua dela jasangarritasunean sakontzeko luminarien aldaketan inbertitzea”.
Herritarren zerbitzuan ere proposatu ditu zuzenketak EAJk, eta hala, bi komun autogarbigarri eta inklusiboak jartzea proposatu du, Pontikan eta Agustinetan bana. Horretarako 80.000 euroko aurrekontua proposatu du.Erdiguneko haur parke bat estaltzeko azterketa da proposatu duen bigarren zuzenketa arloan, eta 27.000 euroko inbertsioa proposatu.
Zuzenketa gehiago, etxebizitza eta gazteriari begirakoak. Zehazki, Etxebizitza Komunitarioaren Programa berrikusteko 35.000 euro bideratzea proposatu dute jeltzaleek: “Etxebizitza komunitarioak dituen 26 plazatik 9 baino ez daude okupatuta. Espektatibak betetzen ez dituen programa baten azterketa kritikoa eta emantzipazioa errazteko baldintzak malgutzeko proposamena da egin duguna”.
Trantsizio energetikoan eta kliman ere jarri dute jeltzaleek fokua, eta Errenteria 2020-2030 plana eguneratzea egiteko 20.000 euro bideratzeko proposatu, “trantsizio Energetikoaren Euskal Lege berrira egokitu eta asmo handiagoko helburuak ezartzeko”.
Proposamenak ere adinekoei, mendekotasunei eta zahartze aktiboari begira; bi zehazki: Mendekotasun plan bat egitea (30.000 euro); erretiratuen elkarteentzako laguntza 16.000 euroan handitzea.
Betetzeko dauden konpromisoei heldu
2026ko aurrekontuari egindako zuzenketak dira aurreko guztiak, baina ez da horietara mugatu EAJ. Izan ere, aurten konprometitutako hainbat jarduketa “aurrerapenik gabe” iritsiko direla 2026ra salatu du, “nabarmentzekoak dira Fanderiako padel instalazioak estaltzeko lanak (120.000 euro) eta lehen sektoreko produktuak merkaturatzeko hobekuntzak (60.000 euro). aurtengoak izanik ere, datorren urteko aurrekontuak sartu direla beste hainbat ere nabarmen jarri du Muruak, “EIT eta Birgaitze lanak (150.000 euro), eta Pontika eta Luis Mariano arteko igogailua eraikitzeko lehenengo fasea (570.000 euro). Azken horren lanak, aste honetan bertan hasi dira. Jeltzaleok horien gaineko jarraipen zehatza egingo dugu”.”Negoziaziorako” eta “akordiorako” borondatea erakustea gobernu taldeak espero dutela esan du Muruak, bestalde, “egin ditugun zuzenketak, finean, bizilagunen eguneroko bizitza hobetzea dute helburu. Errenteriak erronka garrantzitsua du aurretik: arazoak udalerria eraldatzeko eta erreferente gisa kokatzeko aukera bihurtzea”.
Zuzenketak gobernu taldeari helarazi dizkiotela, eta elkarrizketaren bidea zabaldu eta adostasunetara iristeko aukera izatea espero dutela gaineratu du jeltzaleen bozeramaleak, “EAJk ekarpen positiboak egiten jarraituko du, baino orain udal gobernuak besoak gurutzatuta izateari utzi behar dio, eta erabakitasunez politikak zabaltzen hasi, konpromiso garrantzitsuak atzeratu baititu”. Udalerriaren interesen defentsan, EAJ “bultzada eta exijentziaren motorra” izateko borondatea berretsi du, bestalde, Muruak: “euskal eta foru erakundeen laguntzari esker esku hartuko duen, liderra izango den, eta eskura dituen aukera errealekin konektatuko duen udal bat eskatzen dugu. Errenteria ezin da geldirik geratu; bertako bizilagunek politika errealistak eta eraginkorrak merezi dituzte”.
