Haur eta nerabeen eskubideak aldarrikatuko dituzte Pasaian
Gaur Haurren eta Nerabeen Eskubideen Nazioarteko Eguna da, eta egun horren harira, udalak zortzi jarduera ondu ditu hilaren 24tik abenduaren 17ra bitartean.
Gaur (hilaren 20a) Haurren eta Nerabeen Eskubideen Nazioarteko Eguna da. Pasaian haur eta nerabeen eskubideak goratuko dituzte, eta Pasaiako Udalak hainbat jarduera antolatu ditu hilaren 24tik abenduaren 17ra bitartean. Horien artean, antzerkiak, ipuin kontaketak edota hitzaldiak programatu dituzte. Jardueretako batzuk haur eta nerabeei begirakoak dira; beste batzuk, aldiz, gurasoentzako dira. Orotara, zortzi ekintza ondu dituzte haur eta nerabeen eskubideak lehen lerroan jartzeko.
“Pasaiako haur eta nerabeak gure oraina dira, etorkizuna izateaz harago. Eskubidedun subjektu aktiboak dira eta, helduek bezalaxe, iritzia emateko eta udal politiketan parte hartzeko eskubidea dute, bai eta berdintasunerako, babeserako, osasunerako, hezkuntzarako, jolaserako eta ingurune seguru batean bizitzeko eskubideak ere”, adierazi du Teo Alberro alkateak.
Haur eta nerabe guztien eskubideak errespetatzea eta babestea herritar guztien ardura dela baietsi du alkateak. Bide horretan, eta Eskubidean Planaren bidez, udala Pasaia hezitzaileagoa eraikitzen saiatzen ari dela nabarmendu du Alberrok, herriko eragileen elkarlanarekin. Hori dela eta, egitarauko jarduerak Eskubidean herri proiektuaren baitan ondu direla jakinarazi du alkateak, udalaren, hezkuntza komunitateen eta udaleko zerbitzuen inplikazioarekin. Antolatutako jarduera guztiak doakoak dira, aretoetako edukiera bete arte.
Egitaraua
Hilak 24, astelehena
- 17:30: Goazenba! ipuin kontaketa. Donibaneko liburutegian.
Hilak 25, asteartea
- 17:30: Goazenba! ipuin kontaketa. Trintxerpeko liburutegian.
Hilak 26, asteazkena
- 17:30: Goazenba! ipuin kontaketa. San Pedroko liburutegian.
Hilak 27, osteguna
- 17:30: Goazenba! ipuin kontaketa. Antxoko liburutegian.
Hilak 28, ostirala
- 17:00: Haurrentzako jolasak, txokolate hartzea eta dantza tailerra. Donibaneko frontoian.
Abenduak 5, ostirala
- 19:00: Rednudes antzezlana, 14 urtetik gorakoentzat. Donibaneko Juanba Berasategi aretoan.
Abenduak 11, osteguna
- 19:00: Arauak eta mugak hitzaldia, gurasoentzat. Donibaneko kulturguneko erabilera anitzeko gelan.
Abenduak 17, asteazkena
- 17:30: Osasun mentala eta nerabeak hitzaldia, gurasoentzat. Trintxerpeko Alkateordetzan.
