Itsas hondakin bilketak egingo dituzte hilaren 29an
Hondakinen Prebentziorako Europako Astearen baitan, bederatzi itsas hondakin bilketa egingo dira Pasaian, Hondarribian, Donostian, Zarautzen, Zumaian eta Deban, 11:00etatik 13:00etara.
Mater Ontzi Museo Ekoaktiboak sortutako Itsas Zaintza Sarea itsasoaren zaintzan inplikatutako Gipuzkoako 50 itsas eragilek osatzen duten sare berria da. Proiektu horrek Gipuzkoako Foru Aldundiaren Jasangarritasun sailaren laguntza du, eta bere helburua da itsasoaren kontserbazioa sustatzea.
Hondakinen Prebentziorako Europako Astearen baitan, hilaren 29an (larunbatarekin) itsas hondakin bilketak egingo dira Gipuzkoako sei herritan: Pasaian, Hondarribian, Donostian, Zarautzen, Zumaian eta Deban. Orotara, bederatzi itsas hondakin bilketa egingo dira aldi berean, 11:00etatik 13:00etara. Pasaian hiru bilketa egingo dira: Alabortza senadian, Senokozuloko hondoen garbiketa eta badiako gainazalekoarena. Materren arabera, itsas hondakin bilketen xedea da ingurune naturala garbi mantentzea eta hondakinek ingurumenean duten eraginari buruzko kontzientzia sortzea.
Itsas Zaintza Sareak itsas hondakin bilketan parte hartzeko deia luzatu die herritarrei. Era berean, itsasoaren egoeraz kezkatuta dauden itsas erakundeei bertaratzeko dei berezia egin die Materrek: “Haien ezagutza ezinbestekoa da kausa honetarako”. Materrek adierazi du egitasmoa itsasoaren kontserbazioaren alde indarrak batu nahi dituztenei begirakoa dela. Hondakin bilketan edo sarean parte hartu nahi duten horiek Materrekin kontaktuan jar daitezke 619 81 42 25 telefonoan edo helbide elektroniko bidez.
