XARE Jardunaldiak Errenteriara iritsiko dira bigarren urtez
164 gaztek parte hartuko dute euskarazko unibertso digitala sustatzea helburu duen ekimenean.
Dagoeneko zazpi urteko ibilbidea egina du XARE Euskarazko Kultura Digitalaren Jardunaldiak, eta aurtengoan bigarren aldiz iritsiko da Errenteriara. Egitasmoa gazteen, Informazio eta Komunikazioaren Teknologiaren (IKT) eta euskararen inguruan ardazten da, eta euskarazko sorkuntza eta baliabide digitalak gazteen artean ikusaraztea ditu helburu. Eta, horretarako lanabesak ezagutzea ez ezik, ikasleek tresna horiek balioan jartzea ere bilatzen dute, gazte horiek hartzaile-kontsumitzaileak izan eta euskarazko ekosistema digitala aberastuko duten sortzaile eta garatzaile izatera pasatu daitezen. Era berean, plano digitalean pentsamendu kritikoa garatzeko tresnak ere eman nahi dizkie XAREk nerabeei.
Aurtengo edizioak, Errenteriako Udalak, Gipuzkoako Foru Aldundiak eta Eusko Jaurlaritzak babestuta, Koldo Mitxelena, Don Bosco eta Oiartzo ikastetxeetako Bigarren Hezkuntzako 164 ikasle batuko ditu. Hilaren 27an izango da, osteguna. Instituzioetako ordezkariek bertatik bertara jarraituko dituzte jardunaldiaren nondik norakoak, eta ekimeneko lantaldeak 09:00etan Lekuona Fabrikan gazteei egingo dieten harreran parte hartuko dute. Horren ostean, denetariko ekintzak izango dituzte ikasleek, askotariko eduki eta formatuetan: 6 lantegi, lanabes digitaletan trebatzeko eta horien aplikazio errealak ulertzeko, 2 hitzaldi interaktibo arrasto digitalaz eta sare sozialetan modu arduratsuak jarduteko moduaz hausnartzeko, Egunean Behin jokoaren zuzeneko partida bat, Zainduz Saretu ihes-jokoa edota Sara Zozaya artistaren kontzertua.
2017an abiatu zenetik eta 2025era bitarte, 14.340 gaztek hartu dute parte XARE jardunaldietan. 2025-2026 ikasturtean, 4.570 gazte gehiagorengana helduko da Euskarazko Kultura Digital sustatzen duen egitasmoa. Horri buruz, gehiago jakiteko, ikusi honako bideo hau.
