"Amaren etxea defendatuko dugu, justiziaren kontra eta patriarkatuaren kontra"
Oiartzungo Feministen Asanbladak bando bat zabaldu du herrian. Norbere jokaerak aztertzeko eta erasotzaileak babesteari uzteko eskatu dute.
Indarkeria Matxistaren Kontrako Eguna da gaur –hilak 25–, eta Oiartzungo Feministen Asanbladak zenbait ekintza antolatu ditu egun horren harira. Gaur, esaterako, 18:00etan hasita, elkarretaratzea eta ekintza egingo dituzte Doneztebe plazan.
Alabaina, ez da gaurko egunean egingo duten jarduera bakarra, herriko zenbait txokotan hausnarketara bultzatzen duen bando bat zabaldu baitute. “Ikusirik Oiartzunen denok dugula erasotua izan den lagunen bat, baina inork ez duela lagun erasotzailerik ezagutzen, Oiartzungo Feministen Asanbladak nork bere jokaerak aztertu eta zuzentzeko eskaera egiten du, baita erasotzaileak babesteari uzteko eskaera ere”. Horrela hasten da bandoa.
Gauzak horrela, adierazpenean diote auzo guztietan daudela erasotzaileak; “Beraz, irakasle, entrenatzaile, begirale, musikari, etxejabe, enpresari, masajista… Ez baliatu zure boterea ni erasotzeko”. Era beran, exijitu dute parranda ez erabiltzeko emakumeengana “gehiegi” gerturatzeko eta “zure helburuak betetzeko”. Hori, baina, ez da dena, adin txikiko neskak desirarekin begiratzeari uzteko eskatu baitute.
Horretaz gain, argi utzi dute bikoteak osatzen direnean bata ez dela bestearena, ezta bikote izateari utzitakoan ere. Are, nabarmendu dute ez erabiltzeko seme alabak “niri min emateko”. Hortaz, “gure haurrak” aiten, osaben, lehengusuen, aitonen… hatzaparretatik ere babestuko dituztela argi utzi dute.
“Guk argi dugu: amaren etxea defendatuko dugu, justiziaren kontra eta patriarkatuaren kontra. Erasotzaile, aurrean izango gaituzu! Eta zuk, herrikide, zein paper hartuko duzu?”, amaitu dute.
