Mobilizazioak ikastoletan Hezkuntza Sailari konpromisoak betetzeko eskatzeko
2023an sinatu zuten Akordio Laborala Hezkuntza Sailak eta LABek. Orain, hartutako konpromisoak ez dituztela bete salatuko dute, eta horiek betetzeko exijitu.
2023ko ekainaren 1ean Hezkuntza Sailak eta LAB sindikatuak Akordio Laborala sinatu zuten. Akordio horrek Araba, Bizkaia eta Gipuzkoako hezkuntza sare guztietako langileengan eragina izango zuten neurriak adostu eta jaso zituen, baina ikastolek salatu dutenez, bertako langileei dagokien atala bete gabe dago. “Alde batetik, ikastoletako langileen eta sare publikoko langileen arteko soldata parekatzea adostu bazen ere, parekatze hori ez da langile guztiengan gauzatu. Bestetik, lan baldintzek berdintzera jotzeko azterketa egiteko konpromisoa hartu zen, baina ezarritako epea aspaldi gaindituta ere, ez zaio ekin”.
Bide horretan, ikastoletako ordezkariek jakinarazi dute Hezkuntza Sailak akordioa ez betetzeak “ondorio kaltegarriak” dituela ikastolen egoera ekonomikoan eta ikastoletako langileengan, lan baldintzen edota eguneroko lanean. “Herri honek behar duen Hezkuntza Sistemaren eraikuntzan jarraitu nahi dugu. Zuen seme-alabei eskubidez dagokie hezkuntza duina, eta hori langileen lan baldintzekin lotuta dago ezinbestean”, zehaztu dute.
Ildo horretatik, irmoki salatu dute ez dela onargarria igaro den denbora horretan inongo aurrerapausorik egon ez izana; “ez da onargarria sinatutakoari ez heltzeagatik ikastoletako langileon lan baldintzak ez hobetzea. Ez da onargarria, eta ez dugu onartuko”.
Gauzak horrela, Hezkuntza Sailak Akordio Laboralean hartutako konpromisoak bete ditzan exijitzeko mobilizazioak egingo dituzte Oarsoaldeko ikastoletan bihar –hilak 26, asteazkena–. Honakoa da horien zerrenda
Pasaia-Lezo Lizeoa
- 18:30. Elkarretaratze zaratatsua Antxoko Zumardian urdinez jantzita. Jarraian denak Lezora oinez, busez edota autoz.
- 20:00. Lezoko Ikastolan topaketa.
- 20:30. Afari autogestionatua. Ondoren, itxialdia.
- 07:30. Gosaria.
Haurtzaro Ikastola (Oiartzun)
- 19:30. Topaketa Doneztebe plaza.
- 20:00. Babes argazkia plazan. Jarraian, itxialdia hurrengo goizera arte.
Orereta Ikastola
- Orereta Ikastolan ez dute itxialdirik egingo, baina bihar 17:30ean Koldo Mitxelena Plazan elkarretaratzea egingo dute.
