'Liburua opari' kanpaina martxan du udalak
Txartela eskuratzen duten herritarrek %20ko beherapena izango dute euskarazko liburuak erosterakoan, betiere, Errenteria-Oreretako liburu dendetan erosten badituzte.
Euskarazko liburuak erosteko erabili ahalko da txartela. Irakurzaletasuna eta euskarazko literaturari bultzada emateko Liburua opari kanpaina jarri du martxan aurten ere Errenteriako Udalak. Hori horrela, txartela eskuratzen duten herritarrek %20ko beherapena izango dute euskarazko liburuak erosterakoan, betiere, Errenteria-Oreretako liburu dendetan erosten badituzte. Hartara beraz, helburu hirukoitza betetzen du udalak kanpainaren bidez, aurretik aipatutako biez gain, tokiko komertzioaren arlo bati bultzada ere ematen diolako. Herritarren poltsikoei mesede egiten diela ere ezin ahaztu.
Norberak irakurtzeko edota oparitzeko aukera aparta.
Indarrean dago dagoeneko kanpaina eta 2025eko urtarrilaren 5era arte erabili ahalko da beherapen txartela. Txartel horiek berriz, Udalaren Hizkuntza Politika departamenduan eskura daitezke, astelehenetik ostiralera, 08:00etatik 14:00etara hilaren 24ra bitartean; herritar orok eskatu ahal du txartela.
Ikastetxeetan berriz, banaketa berezia egingo du udalak. Horren arabera, Errenteria-Oreretako Lehen Hezkuntzako sei ikastetxeetan banatuko ditu, haurren artean ere, irakurzaletasuna eta euskarazko sorkuntza literarioa sustatzeko.
