Molinao erreka auzolanean garbitu dute
Materrek eta udalak antolatuta, Antxoko erreka auzolanean garbitu zen hilaren 15ean. Orotara, 108 kilogramo hondakin jaso ziren.
Aldaketaren Marea egitasmoa urratsak egiten ari da Pasaian. Mater Ontzi Museo Ekoaktiboak eta Pasaiako Udaleko Ingurumen sailak antolatuta, Antxoko Molinao erreka auzolanean garbitu zuten hilaren 15ean. Materrek sortutako Bio eta Zabor erraldoien laguntzarekin, 15 herritarrek hartu zuten parte hondakin bilketan.
Orotara, 1.105 hondakin jaso ziren, 108,13 kilogramoko pisua zutenak. Gehienbat paper eta kartoi zatiak, zigarrokinak, plastikoak eta elikagai bilgarriak bildu zituzten. Arropa eta zapatilak, metalak eta beira zatiak ere jaso zituzten. Jasotako hondakinen %42,7 plastikoak izan ziren, %19,5 papera eta kartoiak, %8,9 metalak eta %2,1 aparatu elektrikoak.
Parte hartzaileek Molinaoko erreka ingurua eta irisgarritasun errazeko guneak garbitu zituzten. Behemendi elkartea, aldiz, hondakin astunenak eta zailtasun handieneko eremuak garbitzeaz arduratu zen. Behemendi errekaren garbiketa teknikoetan aditua den erakundea da. Hilaren 15ekoaz gain, bigarren saio bat egingo dute Behemendiko kideek, garbiketarekin jarraitzeko.
Partaideen artean Iraitz Pazos Ingurumeneko zinegotzia izan zen, eta herritarrek auzolanean egindako lana eskertu du: “Eskertzekoa da herritarrek auzolanean egin zuten lana. Familia giroan hondakinak jasotzen aritu ginen eta sailkapena eta karakterizazioa egin genituen gero. Halako egitasmoekin jabetzen gara oraindik ere ibilbide handia egin behar dugula gure ingurune naturala zaintzeko eta herritarrei arduraz jokatzea eskatu nahi diegu, garbitutako eremu hau berriz zikindu ez dadin”.
Aldaketaren Mareak aurrera darrai, eta herritarrek abenduaren 20ra arte gozatu ahal izango dute udalak eta eragileek antolatutako jarduerez.
