Oiartzungo Udalak baieztatu du ez duela kontraturik Israelekin loturarik duten enpresekin
Atzoko udalbatzarrean azaldu zuten hori EAJk gaiari buruz egindako galderei erantzunez. Klausula berria abenduaren osoko bilkurara eramango dute bozketarako.
Oiartzungo Udalak ohar bidez jakinarazi duenez, atzoko udalbatzarrean azaldu zuen “ez duela inongo harremanik ez Israelekin ez harekin lotura izan dezaketen enpresekin”. Diotenez, azalpen horiek eman dituzte EAJk gai horri buruz egindako galderei erantzunez.
Kontatu dutenaren arabera, EH Bilduk iragan urrian iragarri zuen harreman ekonomiko, komertzial, diplomatiko eta politikoak etengo zituela Israelekin, eta “gardentasun instituzionalaren izenean” jeltzaleek eskatu zuten argitzea ea “udalak izan duen orain arte Israelekin edo harekin loturak dituzten enpresekin edozein motatako harreman instituzional, ekonomiko edo komertzialik, eta, egon bada, zein data eta modutan gauzatu diren adieraztea”.
Joana Mendiburu Oiartzungo alkateak zehaztu zuen EH Bilduren adierazpenaren ondotik kontratazio teknikariak eta udal idazkariak udalak dituen kontratu guztiak “banan bana” berrikusi zituztela eta “ziurtatu dutela ez duela Israelekin edo harekin harreman komertzial edo instituzionala duten enpresekin kontratu eta harremanik”.
Gauzak horrela, udal gobernuak argi utzi zuen “gardentasuna eta koherentzia etikoa” direla bere jardunaren “oinarri”, eta “urrats bat gehiago” eman nahi dutela iragarri zuen Mendiburuk.
Bide horretan, proposatu zuen etorkizuneko kontratazioetan parte hartuko duten enpresek giza eskubideak errespetatzen dituztela bermatzeko, zinpeko adierazpen bat aurkeztu behar izatea, honakoa ziurtatuz: “Enpresak ez du Nazio Batuen Erakundearen 183. Batzar Orokorrak aldarrikatutako Giza Eskubideen Adierazpen Unibertsalean ezarritakoa urratzen duen eragiketarik egin edo egingo, ez eta Giza Eskubideak Babesteko eta Bermatzeko Sistemek eta Nazioarteko Zuzenbide Humanitarioak ezarritako printzipioak ere”.
Udalaren arabera, klausula horrek “kontratazio publiko arduratsua eta giza eskubideen errespetuan oinarritua” bermatzeko balioko du, bai egungo egoeran, bai etorkizunean sor daitezkeen testuinguruetan.
Oiartzungo Udalaren oharrean diotenez, “EAJk ez zuen proposamenarekiko bere posizioa momentuan argitu eta adierazi zuen gaia aztertuko dutela”.
Gauzak horrela, klausula berria abenduaren osoko bilkurara eramango dute bozketarako.
