TindEHEr egitasmoak euskaraz batuko ditu Baiona eta Oreretako gazteak
Bihar, larunbata, ekarriko du etxera Oreretako Gazte Asanbladak TindEHEr Euskal Herrian Euskaraz antolakundearen iniziatiba berria.
Gaztetxearen artxiboko irudiaJardun koordinakundea TindEHEr Gazteak Euskaraz Batuz Euskal Herrian Euskaraz antolakundearen egitasmoak Zabala Enea II gaztetxean hartuko du lur bihar, larunbata. Euskara erdigunean, Oreretako Gazte Asanbladako eta Baionako Zizpa Gaztetxeko kideak Euskal Herriko eskualde ezberdinen arteko sareak josten, euskararen gainean hausnartzen, eta azken hori indartzen ariko dira topaketa horretan.
EHEren egitasmo berria kezkatik sortua da. Batetik jabetu ziren azken urteetan Euskal Herrian oro har, eta gazteen artean zehazki, euskararen egoeraren ustezko normalizazioaren ilusioa zabaldu dela, “hizkuntza eta nazio auzien inguruan despolitizazio joera nabarmen bat gertatu den aldi berean”. Bestetik Euskal Herriko eskualde desberdinen arteko harreman eta loturak urriak baziren, gehiago lausotzen ari direla dio EHEk.
Horrekin jabeturik, “kontzientzia linguistikoa berpiztea” dute helburu abiatu duten egitasmoaren bidez, baita lurralde ezberdinen arteko harremanak sustatzea ere. Hartzaileak, hasiera batean behintzat, antolatuta dauden gazte euskaldunak, gaztetxeak eta gazte asanbladak, horien arteko senidetzeak sortuz epe luzerako harreman iraunkorrak josteko. Biharkoa, euskaratik eta euskaraz, Zizpa Gaztetxeak eta Oreretako Gazte Asanbladak bide horretan egingo duten lehen urratsa izango da. Egitarau zabala antolatu dute horretarako, egun osoz. Harrera, hausnarketa, bazkaria, eta kontzertuak ere ez dira faltako.
tindEHEr, egitaraua
- 10:30: Harrera Gaztetxean
- 11:00: Baiona eta Oreretako testuingurutan sakontzen gaztetxean
- 14:30: Bazkaria Landare elkartean. Bazkalostean bingo musikatua eta karaokea Landaren bertan. (Bazkarirako txartelak, 5 euro balio ditu)
- 18:00: Poteo girotua
- 22:30: Kontzertuak: Komerik, Ximaur eta DJ Pottottis. Doan.
