'Arditurri 3' erromatar garaiko galeria zabalduko dute zubian
Abenduaren 6an eta 8an zabalduko dute galeria hori, eta bertaratzeko izena eman behar da aldez aurretik. 10 euro balio du bisitak.
Abenduko zubia dela eta, Arditurrin bisita berezia antolatu dute. Zehazki, Arditurri 3 erromatar garaiko galeria zabalduko dute hilaren 6an eta 8an, baina soilik hamalau urtetik gorakoek izango dute aukera bertan sartzeko.
Erromatar garaitik gaur egun arte ezkutuan eta eraldatu gabe mantendu da galeria hori, eta urteko egun zehatz batzuetan baino ez dute zabaltzen.
Bisita horretan duela 2.000 urte meatzariek egiten zuten lana “zentzumen guztiekin” sentitzeko aukera izango dute bertaratzen direnek abenduko bi egun horietan. Bi txanda egingo dituzte egun bakoitzean: goizeko hamarretan gaztelaniaz, eta 11:30ean euskaraz.
Aurreratu dutenez, galeriaren tamaina txikia da, eta hortaz, bisita bakoitzean 7 pertsona egongo dira, gehienez.
Bisitak hamar euro balio du, eta erreserba aurrez egin behar da helbide honetara mezu bat idatzita edota 943 49 42 48 zein 688 89 50 68 zenbakietara deituta.
