Patri Urkizuri aitortza eta bertsoak Madrilen
UNEDen omendu zuten atzo Patri Urkizu Sarasua lezoarra, bertan irakasle eta hizkuntza gutxituen aldizkariaren sortzaileetakoa izan zelako.
Atzoko aitortza ekitaldiaren une bat.Aritz Galarraga 2024ko abenduan hil zen Patri Urkizu Sarasua irakasle, idazle, filologo, ikertzaile, kirolari, Euskal Idazleen Elkarteko lehendakari eta euskaltzain urgazlea, eta Lezoko alkate izandakoa besteak beste. Harekiko aitortza ekitaldiak asko eta askotarikoak izaten ari dira. Azkena atzo (abenduak 1, astelehena) egin zuten Madrilen, UNEDen (Espainiako Urrutiko Hezkuntzako Unibertsitatea) egoitzan: bertan euskal filologia eta literatura irakasle izan zen Urkizu urte askoz, eta gainera, erakunde horren Revista de lenguas y literaturas catalana, gallega y vasca aldizkariaren sortzaileetako izan zen.
UNEDen arduradunak, ekitaldiaren hasieran Josep Isern aurkezlearekin (eskuinean). Argazkia: Aritz Galarraga.
Ekitaldi hunkigarria izan zen Madrilekoa. Euskara, katalana eta gaztelania elkar bizi izan ziren UNEDen ekitaldi aretoan. Baita bertsoak ere. Ukitu akademikoa izan zuen, unibertsitate horretako protokoloek gidatua. Ruben Chacon dekanoak hitz egin zuen lehenik, eta ondoren Antonio Moreno Filologia klasikoko departamenduko zuzendariak. Urkizu goresteko hitzak izan zituzten, eta UNEDen egindako lana arras eskertu zioten. Ekitaldiaren aurkezpen lanak Josep Isern Revista de lenguas y literaturas catalana, gallega y vasca aldizkariaren zuzendariak egin zituen. Urtero parte hartzen zuen lezoarrak aldizkari horren edukietan. Agerkari horren 30. zenbakian lezoarra omendu dute. Hemen klik egitean, aldizkari horren aldaera digitalera joateko aukera dago.
Urkizu lanean ezagutu zutenek hitz ere hitz egin zuten. Genaro Costas aritu zen esplikatzen nola sortu zuten UNEDen barruan euskal filologiaren eta euskal literaturaren atala, eta ikasgai hori mundu osoko ikasleei ematen ziela adierazi zuen. Julia Butinyak esan zuen euskarakoaren ondoren katalanaren ikasgaia sortu zutela UNEDen, hura izan zen horren irakaslea. Hark Urkizurekin bulegoa urte askoz konpartitu zuen, katalanez goraipatu zuen lezoarrak egindakoa. Joan Miquel Ribera UNEDen aldizkarirako edukiak egiten dituen irakasle katalanak nabarmendu zuen hainbat hizkuntzaren arteko elkarbizitza espazioa sortu zutela Urkizuren eta beste askoren lanari esker.
Mari Jose Olaziregi Euskal Herriko Unibertsitateko irakasleak ere hartu zuen hitza Madrilgo aitortza ekitaldian, askotan parte hartu zuen hark Urkizuk antolatutako jardunaldietan: lezoarrak alor ezberdinetan egindako ekarpena goraipatu zuen.
Urtzi Urkizu semea ere izan zen UNEDen ekitaldian. Eskribu galduen bila sormen lanaren hainbat pasarte baliatuz, aitaren bidearen trazak eman zituen. Eskertu zuen UNEDen aintzat hartzea aitak egindakoa, eta bertsoa ere eskaini zien besaulkietan ziren ikus-entzuleei. Beheko bideoan ikus daiteke nola jarri zion puntua Urtzi Urkizuk Espainiako hiriburuan egindako aitortza ekitaldiari.
Urtzi Urkizu, ekitaldian hitza hartu bitartean. Argazkia: Aritz Galarraga.
