Saretu, euskararen biziberritzean indar berri bat sortzeko
Euskararen aktibazioa sustatzeko, Euskaltzaleen Plazak egingo dira Pasaiako lau barrutietan. Lehena gaur izango da, Trintxerpeko alkateordetzan, 19:00etan.
Azken hamarkadetan zehar egindako ahalegin kolektiboari esker euskararen biziberritze prozesuak aurrerapen handiak izan ditu, baina aldi berean asko dira susperraldi aro hori eten denaren eta atzeraldia etor daitekeen zantzuak. Horri begira, Oarsoaldeko herrietan herritarren saretzeari begirako dinamikak abiatu edo abiatzear dira, horiek aktibatzeko eta euskaraz bizitzeko espazioak irabazteko. Plazak irabazteko. Euskararen erabilera sozialaren ahultzearen jakitun, itxaropenez eta anbizioz helduko diete dinamika horiei.
Aktibazioaz hitz egiterakoan, euskara dakitenen aktibazioaz ari dira herrietan sare eta plaza horien gaineko lanketa egiten ari direnak. «Euskaraz bizitzeko espazioak irabazteko, euskaraz lasai eta eroso aritzeko eskaera zein proposamenak egingo dituen hiztun komunitatea izango da oinarria». Norbanakoz osatutako sareen bila hasi dira.
Zentzu horretan, saretze eta aktibazio lan horretan aurreratuen Pasaian daude: «Euskaraldiaren testuinguruan, aktibatzaileak saretzen hasteko, euskararen erabilerari buruz Pasaiako herritarren kezkak, interesak eta proposamenak bildu ziren. Banakako elkarrizketen bidez, eta barrutika talde solasaldi ezberdinetan». Horren segida iraunkorra izan nahi dute Pasaiako euskaltzaleen plazek, «euskaltzaleen sarea sendotu eta elkarrekin pentsatu eta hausnartzeko elkarguneak izango dira Pasaiako Euskaltzaleen Plazak».
Aurkezpenak
Euskara aktibatzaileen komunitatea irudikatu eta zabaltzea, mugimendu baten parte sentitzeko espazioak proposatuz; eta euskararen erabilera areagotzeko dinamika zehatzak pentsatu eta proposatzea, interes eta behar propioetatik (behetik gora) antolatzeko aukerak sortuz. Horiek dira Pasaiako Euskaltzaleen Plazen helburu zehatzak. Horri begira, jendartera zabalduko dute orain arteko saretzea zertan den, Euskararen Egunaren bueltan.
Gaur (asteazkena) izango da Trintxerpeko deialdia (19:00, alkateordetzan), bihar (osteguna, hilak 4) San Pedrokoa (18:30, Ertin), hilaren 9an Donibanekoa (19:00, Juanba Berasategin) eta hilaren 11n Antxokoa (18:30, Kultur Etxean).
