Andonaegi auzoko asfaltatzea hobetu du Pasaiako Udalak
Oiartzun, Urgull, Tokia Alai eta Andonaegi kaleetan egin dituzte lanak. Esku hartzearen zenbatekoa 30.547,23 euro + BEZ izan da.
Pasaiako Udalak jakinarazi duenez, Obra eta Zerbitzu Sailak Andonaegi auzoko asfaltatzea hobetzeko eta konpontzeko zenbait lan egin ditu. Zehatzagoak izate aldera, lan horiek Oiartzun, Urgull, Tokia Alai eta Andonaegi kaleetan egin dituzte.
Eraikinetan birgaitze lanak amaitu zituztenean bide publikoa garbi geratu zela diote, eta zoladuran, areketan eta zoruan hobekuntzak egin behar zirela ikusi zutela. Hortaz, udalak enpresa bat kontratatu zuen horretarako, eta asteon amaitu dituzte lanak.
Jakinarazi dutenez, honako lanak egin dituzte: gune kaltetuenetan zoladura moztu eta eraitsi; gainazala profilatu eta trinkotu, eta, ondoren, aglomeratua berotan jarri. Era berean, zenbait areka, kutxatila eta hustubide konpondu dituzte “drainatzea hobetzeko eta euri urak biltzeko sarearen egoera ona bermatzeko”.
Bestalde, udalak jakinarazi du prozesu osoan zehar Udaltzaingoarekin koordinatu direla “oinezkoei eta inguruko zirkulazioari ahalik eta traba gutxien” eragiteko.
Azkenik, azaldu dute esku hartzeen zenbateko osoa 30.547,23 euro + BEZ izan dela.
