Lezokoak elkartea, jasotakoa lezoarrei itzultzeko prest

Lezokoak Merkatari, Ostalari eta Zerbitzuen elkarteak egitasmo asko abiatu ditu urtean zehar lezoarren fideltasuna saritu, eta erosketak herrian egiteko mezua zabaltzeko.

Lezokoak Merkatari, Ostalari eta Zerbitzuen elkarteak ahalegin berezia egin du aurten herriko denda, komertzio eta zerbitzuen erabiltzaile direnei eskerrak eman, eta euren fideltasunari erantzuna emateko. Hainbat izan dira abiatu dituzten egitasmoak, bi helburu nagusirekin: batetik, lezoarrek herriko establezimenduei dieten leialtasuna saritzea, eta bestetik, herrian kontsumitzeko arrazoiak eta aukerak ematea.

Elkartekideek ondo dakite ez direla ingurune errazean ari lanean: ondoan herri handiak dituzte, komertzio askokoak; hurbilean merkataritza zentro erraldoiak ere badaude; eta azken urteetako Interneteko erosketen aroak ez du etenik. Dena dela, irmo ari da lanean Lezokoak lezoarrek herrian erosketak egin, bertako establezimenduetan kontsumitu, edo herriko zerbitzuak erabil ditzaten. Ez hori bakarrik: herrian egiten diren jarduera askoren babesle eta laguntzaile da elkartea, sinisten duelako Lezo bizia nahi bada, euren negozioei begiratzeaz gainera, herriari ere begiratu behar diotela. Herriaren egunerokoan eragile da Lezokoak. Elkarlanean, proiektu askori eutsi dio urtean zehar.

 Adibidez, Lezoko Bidea egitasmoak arrakasta berezia izan du. Pasaporte antzeko batean, bertan ziren 20 hutsuneak herriko establezimenduetan kontsumitu ondoren jasotako zigiluekin bete behar zituzten herritarrek, ondoren bonu horiek entregatu eta 1.000 euroko bi sari lortzeko, zozketan: abenduaren 1ean egindako zozketan, Jone Mendigutxia eta Julen Salaberria izan ziren garaile (irudian). 

Urte bukaera aldera ere bai, Lezo Bonua kanpaina egin du Lezokoak-ek, udalarekin elkarlanean: 3,5 euroko balioa zuten bonua erosi, eta 5 euroko erosketa egin ahal izan dute bonuen onuradunek azaroan zehar; 1,5 euroko aldea Lezoko Udalak hartu zuen beregain. Gainera, Altxa Burua Lezoren Gurea erabil dezakezu kanpainarekin bat egin du Lezokoak-ek, eta herriko haurrek, sakelako telefonoak erabili beharrean, herriko komertzioetakoak baliatu ditzakete.

Paella, xirimiria, agendak, poltsak…
Lezokoak-en kalera begirako jarduerarik jendetsuena maiatzaren 17ko herri paella jatea izan zen: 400 bat lagun bildu zituen Karlos Saldise plazan. Horretara joateko txartelak herriko establezimenduetan kontsumitzeagatik gonbidapen bidez lortu zituzten horiek guztiek, eta gainera, bazkarian bertan zozketak egin ziren.

Bestalde, urrian erosleen artean agenda bereziak banatu ditu elkarteak, baita erosketak egiteko poltsak ere. Aterki hori deigarriak ere egin ditu Lezokoak-ek Xirimiri egitasmoarekin, eta egun euritsuetan erne ibiltzen ez direnei uzten dizkie, gerora horiek hartu diren establezimenduetara itzultzeko. 

Erne: Gabonetako zozketa bereziak egingo dituzte herriko 40 bat establezimendutan. Horietako bakoitzean 125 euro inguruko balioa duen saskia prestatu dute zozkatzeko.

Zer garrantzi du herriko establezimenduetan kontsumitzeak?

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.