Pasaiako etxez etxeko langileek hitzarmen kolektibo berria lortu dute
Hilabete askoko borrokaldia eta 108 eguneko greba mugagabea eten dute langileek. "Zaintza lanaren garrantzia eta zentralitatea aldarrikatu ditugu"
Etxez etxeko langileak, atzo, hitzarmena sinatu berritan. Pasaiako etxez etxeko langileek hilabete askoko borrokaldia eta 108 eguneko greba mugagabea eten dute. “Pasaiako Udalak azpikontratatua duen etxez etzeko laguntza zerbitzuaren gaineko akordioa portu da”, esan dute ELA eta LAB sindikatuek. Sindikatuek azaldu dute euren eskakizunen “zati handi bat” aintzat hartu dela lan hitzarmen berrian. Borrokaldian “zaintza lanaren garrantzia eta zentralitatea” aldarrikatu dituztela jakinarazi dute, eta lan baldintzak hobetzearen zuzeneko onuradunak langileak badira ere, zerbitzua jasotzen duten pasaitarren hobebeharrerako urrats sendoak ere eman direla azaldu dute. Atzo bertan sinatu zuten hitzarmena gaiarekin harremana duten hiru aldeek: langileek, Pasaiako Udalak, eta zerbitzua esleitua duen Matia Goxara enpresak.
Azken asteak negoziazioz beterikoak izan dira. Pasaiako Udalak zerbitzuaren hobekuntzarako eta langileen lan baldintzak hobetzeko ahalegin sendoa egin du, zerbitzurako diru partidak nabarmen handituz. Baina, udalaren nahiz langileen zalantza zen diru gehikuntza hori enpresak erabiliko ote zuen bere onurarako; negoziazioen koska handienetakoa izan da hura. Akordioa egin da, ordea, eta langileek adierazi dutenez, euren lan baldintzak hobetzeko eskaera ia denak jaso dira hitzarmenean.
Udalaren ahaleginari balioa eman diote langileek: “Oso positiboki baloratzen dugu Pasaiako Udalak feminizatua dagoen eta soldata arrakala pairatzen duen sektore baten baldintzak hobetzeko egindako apustua; izan ere, honek beren lana duintzen du eta prekarietatea murrizten laguntzen du”. 43 langileko kolektiboa da etxez etxeko langileena, ia denak emakumeak. “Kolektibo hau prekarietate eta diskriminazio egoeran zegoen, azpikontratazioaren ondorioz euren lan baldintzak administrazioan kategoria bereko eginkizunak egiten dituzten langileenak baino askoz okerragoak zirelako”, zehaztu dute sindikatuek. Alta, azpikontratazioaren langa hautsi, eta zerbitzua publiko izateko lanean jarraitzeko borondatea agertu dute ELAk eta LABek.
Hobekuntzak
Sindikatuek lan hitzarmen berrian jaso diren hobekuntza nagusien berri eman dute. Soldatak %30ean igoko dizkiete langileei, behargin guztiek astean gutxienez 25 orduko lanaldiak izango dituzte, eta atsedenerako egun gehiago ere izango dituzte. Bai langileak zein sindikatuak pozik azaldu dira, borrokaldiak luze eta gogor iraun arren, lortutakoarekin: “Borrokak merezi izan du”.
