Trintxerpeko Igeldo kalea berrurbanizatu dute
Pasaiako Udalak bukatu ditu Trintxerpeko Andonaegi auzoko Igeldo kalea berrurbanizatzeko lanak, auzo osoaren birgaitze integraleko planaren barruan.
Pasaiako Udalak bukatu ditu Trintxerpeko Andonaegi auzoko Igeldo kalea berrurbanizatzeko lanak, auzo osoaren birgaitze integraleko planaren barruan. Igeldo kalearen berrurbanizazioa Andonaegiko eraldaketa sakonaren barnean dagoela jakinarazi du udalak, “energia eraginkortasuna, irisgarritasuna eta bizi kalitatea hobetzea helburu duen plan integralaren barruan”.
Proiektua Europako Batasunaren NextGenerationEU funtsen bidez finantzatutako Berreskuratze, Eraldatze eta Erresilientzia Planaren zati bat dela baietsi du udal erakundeak. Jarduketek 1.195.323,74 euroko aurrekontua izan dute, BEZa barne. Udalak adierazi du hasierako aurrekontua baino handiagoa izan dela, beste lan batzuk ere egin behar izan dituztelako. Udalak egindako inbertsiotik, 466.279,15 euro NextGeneration funtsen bidez finantzatu dira.
Lanen artean, espaloiak zabaldu dira, eta bideak irisgarri eta erosoagoak izan daitezen, egokitu egin dira, urbanizazio kotak atarien kotekin bat egin dezaten. Horrez gain, argiztapena eta saneamendu sarea berritu eta elektrizitate eta telefoniako kableak lurperatu dira. Berdeguneak sortu eta zuhaitzak ere landatu dira.
Teo Alberro alkateak eta Iraitz Pazos Hirigintza zinegotziak egindako lanak ikusi dituzte. “Igeldo kaleko berrurbanizazioa Andonaegiko birgaitze integralaren beste urrats sendo bat da. Kaleak irisgarriagoak egin ditugu, energiaren ikuspegitik eraginkorragoak diren azpiegiturak jarri ditugu eta espazio publiko atseginagoak sortu ditugu. Espaloi zabalagoak, argiztapen berritua, berdegune gehiago eta kableak lurperatzea: guztiak dira auzo bizigarriago baten aldeko inbertsio zuzenak. Trintxerpetarrek egunerokoan nabarituko dute hobekuntza”, adierazi du Pazosek.
Bestalde, honakoa esan du alkateak: “Andonaegiko eraldaketa ez da obra tekniko soil bat; gure barrutietako bizitza hobetzeko dugun konpromisoaren adierazgarri zuzena da. Igeldo kalea berritu eta irisgarriago bihurtzeak esan nahi du bizilagunek seguruago eta erosoago mugitu ahal izango dutela, eta hori oinarrizkoa da herri inklusibo bat eraikitzeko”.
Andonaegiko eraldaketa integrala
Igeldo kaleko berrurbanizazioa Andonaegi auzoko birgaitze integralaren fase bat dela gogorarazi du udalak, non 19 ataritan banatutako 190 etxebizitza zaharberrituko diren. Plan integral horrek hiru oinarri dituela nabarmendu du udal erakundeak: eraikinen birgaitze integrala (irisgarritasuna eta energia eraginkortasuna), urbanizazioa eta ekipamendu publikoa. Hori guztia faseka egingo du udalak, eraikinen zaharberritzetik eta Igeldo kalearen urbanizaziotik hasita.
Kaleak berrurbanizatzeko planak oinezkoentzako eta egoteko eremuak eta zuhaiztiak berritzea lehenesten dituela zehaztu du udalak, eta hiri altzariak hobetzea eta azpiegiturak berritzea dakartza. Bestalde, hegoaldera begira dauden egonleku berriak sortzeko eta kaleen arteko komunikazio bertikalak hobetzeko balioko dutela nabarmendu du udal erakundeak. “Oro har, lehentasuna emango zaie oinezkoentzako guneei eta irisgarritasunari”, esan dute.
“Datozen urteetan jarraituko dugu Andonaegiko eraldaketa honekin: etxebizitzen birgaitzea, kaleen arteko lotura bertikalak hobetzea eta etorkizuneko igogailuaren egitura prestatzea. Andoanegiko urbanizazioaren bigarren faserako 661.400 euro aurreikusi ditugu 2026ko aurrekontuan. Pauso sendoekin ari gara herria duintzen eta etorkizunerako prestatzen”, adierazi du Alberrok.
