Ander Aramendik brontzea lortu du Europako Kros Txapelketan
Atzo Europako Kros Txapelketa jokatu zen Algarveko Lagoa herrian (Portugal), eta taldekako sailkapenean hirugarren izan ondoren, domina ekarri du etxera.
Atzo Europako Kros Txapelketa jokatu zen Algarveko Lagoa herrian (Portugal). Portugalen Europa osoko kros lasterkari onenak aritu ziren, 20 urtez azpiko, 23 urtez azpiko eta maila absolutuan. Horien artean, Ander Aramendi Aginaga sanjuandarra izan zen, 20 urtez azpikoen mailan. Aramendi Espainiako selekzioarekin izan zen, Donostiako eta Zornotzako Nazioarteko Krosak irabazita. Prestatzaileak Burgosko Atapuercako Krosaren ondoren osatu zuen seikoa. Aramendi bosgarren izan zen Burgosen, eta Europako Txapelketara joateko hautatua izan zen.
Atzoko txapelketan, selekzio bakoitzeko lehen hiru lasterkariek puntuatzen zuten, eta sei horietatik Aramendi hirugarren izan zen. Sanjuandarraren postua erabakigarria izan zen taldekako brontzezko domina lortzeko. Bakarka, 30. postuan sailkatu zen.
Aramendik ezin hobe agurtu ditu 2025a eta 20 urtez azpiko maila. Bitan izan da nazioarteko txapelketetan: udan Finlandiako Aire Libreko Txapelketetan izan zen, eta zortzigarren izan zen 3.000 metrotako proban; orain Portugalgo Europako Kros Txapelketan lehiatu da, eta brontzezko dominarekin itzuli da Donibanera.
