Caritasen Taupa-bira Errenteria-Oreretan izango da hilaren 22an
Topaketa Foru plazan izango da, 11:00etatik 13:30era eta 16:30etik 19:30era. Iniziatibaren helburua da "pobreziaren errealitateaz sentsibilizatzea eta elkartasun keinuak sustatzea".
Argazkia: Caritas Gipuzkoa. Caritas Gipuzkoaren Taupa-bira egitasmoa Errenteria-Oreretan izango da hilaren 22an. Topaketa Foru plazan izango da, 11:00etatik 13:30era eta 16:30etik 19:30era. Zure konpromisoak Eguberria argitzen du lelopean, iniziatibaren helburua da “pobreziaren errealitateaz sentsibilizatzea eta elkartasun keinuak sustatzea”.
Taupa-biraren ardatza material birziklatuekin egindako Gabonetako zuhaitz bat izango da. Herritarrek zuhaitz horretan zintzilikatu ahal izango dituzte “komunitate bidezkoago eta solidarioago bat eraikitzeko dituzten nahiak, konpromisoak edota ideiak jasotzen dituzten txartelak”. Horrez gain, Caritaseko boluntarioek informazio puntu bat jarriko dute, erakundearen lan sozialari eta boluntariotzan parte hartzeko aukerei buruzko informazioa emateko.
Caritaseko kideek herritarrak gonbidatu dituzte parte hartzera. Taupa-birak “konpromisoak, ideiak, eta desioak” partekatzeko espazio bat izan nahi duela adierazi dute sustatzaileek, “gizarte bidezkoago eta solidarioago baterantz urratsak egiteko”. “Uste dugu tokiko erakunde eta elkarteen parte hartzeak balio berezia eman diezaiokeela egitasmo honi, eta espiritu komunitario hau urrunago iristen lagundu dezakeela”, esan dute.
