Antxok kalistenia parke bat izango du
Aire zabaleko gune hori Ibaiondo frontoiaren ondoko plazan kokatuko dute, belargunearen ondoan. Hilaren 24rako bukatuta egotea aurreikusi du udalak.
Pasaiako Udalak kalistenia parke berri baten eraikuntza abiatu du Antxoko Ibaiondo frontoiaren ondoko plazan, belargunearen ondoan. Proiektuaren helburua da aire zabaleko kirola sustatzea, “jarduera fisikorako sarbidea erraztuz eta espazio publikoaren erabilera soziala indartuz”. Hilaren 24rako bukatuta egotea aurreikusi du udalak.
Kalistenia parkeek berezitasun nagusi bat dutela adierazi du udalak: “Behin eraikita, ez dute aparteko materialik behar, norberaren gorputzaren pisua da entrenamendurako tresna nagusia”. Ezaugarri horrek kirola “modu librean, irisgarrian eta doan” egiteko aukera ematen duela nabarmendu du udal erakundeak, eta, ondorioz, “jarduera fisikoa demokratizatzen du”. Honakoa esan du Julen Rodriguez Kirol zinegotziak abiatutako proiektu berriaren inguruan: “Kirol politikek oinarrizko printzipio bat izan behar dute: edonork, baldintzak edo baliabide ekonomikoak gorabehera, kirola egiteko aukera izatea. Eta horren aldeko kirol politikak sustatzen dihardugu”.
Kalistenia parkeko instalazioak adin eta gaitasun ezberdinetara egokitutako aparatuak izango dituela jakinarazi du udalak, erabiltzaile bakoitzak bere erritmoan eta modu autonomoan erabil ditzan. Horrek “espazio ireki eta malgua” sortzen duela zehaztu du udal erakundeak, entrenamendu mota ezberdinak ahalbidetzen dituena. “Halako guneek aukera ematen dute belaunaldi eta maila guztietako pertsonek espazio bera partekatzeko, bakoitzak bere modura eta presiorik gabe”, esan du Rodriguezek.
Horrez gain, kokapenak belaunaldien arteko erabilera sustatzen duela baietsi du udalak. Kalistenia parkea Ibaiondoko zabalgunean kokatuko da, aire libreko parke bioosasungarriaren azpian, eta frontoiaren alboan. Parke bioosasungarria, batez ere, adineko pertsonek erabiltzen dutela jakinarazi du udalak, baina edonorentzat erabilgarri dagoela gogorarazi dute. Udal hautsiaren arabera, “instalazio horien arteko hurbiltasunak harreman naturalak sortzen ditu, eta belaunaldien arteko elkarbizitza sustatzen du”.
Kalistenia parkea Ibaiondoko zabalgunea biziberritzeko udalaren ikuspegi zabalago baten barruan kokatzen dela adierazi du udalak, “eremua paseorako, aisialdirako eta aire zabaleko jardueretarako gune gisa sendotu nahi baita”. Rodriguezen hitzetan “helburua ez da soilik kirol azpiegitura bat jartzea, baizik eta herritarrek egunerokoan erabiltzeko moduko espazio atsegin eta bizia sortzea”.
Gunearen diseinuan egurra eta metala uztartuko dira, “ingurunearekiko integrazioa zaintzeko”, eta lurrean moteltze sistemadun soropil artifiziala jarriko da, segurtasuna bermatzeko. Jarduketek 27.213 euroko aurrekontua izan dute, eta eguraldiak laguntzen badu, hilaren 24an inauguratzea espero du udalak.
