Beraun kalea eraberritzeko lanak bukatu ditu udalak
Hiri berroneratzeko proiektu zabal hori gauzatzeko, 2.345.614 euro inbertitu dira, hiru urteetan, eta Eusko Jaurlaritzaren 725.00 euroko laguntza izan du.
Beraun kaleko lanak bukatu dituzte. Errenteriako alkateak eta Hirigintzako zinegotziak, auzokideen ordezkariekin eta udal teknikariekin batera, bisita egin dute Beraun kalean egin diren hiri berroneratzeko esku hartzeen emaitza ikusteko. Espazio zabal hori birsortzeko proiektua 2022. urtearen amaieran hasi zen, eta egindako plangintzaren arabera, hiru fasetan garatu da.
Lehen fasean, 63 ibilgailurentzako lur gaineko aparkaleku berri bat sortu zen eta gerora horri batu zaio kalearen beheko aldean eraiki den aparkalekuen eraikina. Txakurrentzako parkea ere birkokatu zen, berdegune berri bat sortuta. Bertan, tirolina berri bat jarri da dagoeneko.
Kalearen behealdean kotxeentzako aparkalekuen eraikina eraikitzearekin batera, ingurunearen urbanizazioa eta bidegorriaren zati baten zabalkuntza ere egin ziren.
2024an amaitu zen esku hartzearen lehen fase horretan esku hartze garrantzitsuak egin zituen udalak saneamendu eta euri uren sarean, eta 669.614 euro erabili zituzten guztira. Proiektuaren bigarren fasean, bi plaza berri sortu ziren 5. eta 15. zenbakien artean, 1.500 m² baino gehiagorekin, eta egoteko eta jolasteko eremuak zabaldu ziren, 0-3 urte bitarteko haurrentzako parke bat sortuz eta azalera landareduna jarriz. Autobide azpiko tunelean ere esku hartu zuen udalak, seguruagoa eta ibiltzeko errazagoa izan zedin.
2024an bukatu zen bigarren fase hori gauzatzeko 890.000 euro erabili ziren.
Hirugarren eta azken fasean, kale osoan zehar irisgarritasuna hobetzeko beharrezko lanak egin dira, jarraikortasuna emanez, oztopoak kenduz eta espaloiak zabalduz, batez ere behealdeko eta erdialdeko zatian. Bidegorria igogailuetaraino ere zabaldu da eta ibilgailuen trafikoaren abiadura murrizteko neurriak indartu dira, oinezkoen mugikortasuna seguruago bihurtuz.
Azken fase hori orain bukatu da, eta guztira 786.000 euroko inbertsioa egin dute.
2.345.614 euroko proiektua guztira
Hiri berroneratzeko proiektu zabal hori gauzatzeko, 2.345.614 euro inbertitu dira, hiru urteetan, eta Eusko Jaurlaritzaren 725.00 euroko laguntza izan du.
Eraberritze proiektu hori, irisgarritasuna hobetzeko 2019an egindako esku hartzeei batzen zaie. Zeinetan Beraun kalea, Galtzaraborda etorbidea eta Beraun kalearen behealdean dagoen aparkalekuen eraikina lotzen dituzten hiri igogailuak eraiki ziren: “Horrekin guztiarekin, hiri eremu garrantzitsu bat erabat eraldatu da, bizigarriagoa bihurtuz”.
Orain inguru hori hobetzen jarraituko du Udalak, Pontika eta Luis Mariano plaza lotuko dituen hiri igogailu berria eraikiz. Eraikuntza lan horiek ere martxan daude dagoeneko. 2023-2027 Agintaldi Planaren barruan jasota daude jarduketa horiek guztiak.
