Neguko arropa eta manta bilketa egingo du Oarsoaldeko kontseilu Sozialistak
Bihar ostirala, eta etzi larunbata egingo ditu bilketak Errenteriako udaletxearen arkupetan.
Oarsoaldeko Kontseilu sozialistak neguko arropa eta mantak bilduko ditu bihar, ostirala—hilak 19— eta etzi larunbata —hilak 20— miseria eta pobretzeak eraginda kale gorrian dauden pertsonentzat. Gogor salatu du sistema antolakunde sozialistak, izan ere, oinarrizko beharrak “aberastasuna sortzeko” erabili eta gizarte zerbitzuen murrizketa zein etxebizitza politiken eragina ezkutatzea. Horien ondorioz, asko direla miseria eta pobretzeak eraginda kale gorrian dauden pertsonak gaineratu du.
Kaltetuena langile klasea dela adierazi du, gainera, “gizartearen gero eta kapa zabalagoa oinarrizko beharrak asetzeko ezintasunera kondenatu dute”. Horren adibide bat jarri du, datuak emanda:”Araba. Bizkai, eta Gipzukoan 1.500 pertsona baino gehiagok egiten dute lo egunero kalean, 2022ko kopurua bikoiztuta”.
Langileen pobretzearen kontura etxebizitzaren negozioan parte hartzn dutenen, supermerkatuen, eta eraikuntza enpresen irabaziak handitzen direla salatu du, “gizarte osoaren ongizatea bermatu beharrean, baliabideak gutxi batzuen aberastasuna handitzera bideratzen dira”.
Instituzioekin ere kritiko azaldu da Kontseilu Sozialista, eta “negozio” hori babestu eta hauspotzea egotzi die, “miseria kudeatzaile soil bilakatu dira”. Horren aurrean klase elkartasuna baino ez zaiela gelditzen erantsi du. Hori horrela bilketetan parte hartzera eta ekarpena egitera deitu dituzte herritarrak. Bihar 18:00etatik 20:00etara jasoko dituzte arropa eta mantak; etzi, 11:00etatik 14:00etara.
