Mariasun Landa Sarietarako lanak aurkeztu daitezke
Errenteria-Oreretari bertako emakumeek egindako ekarpena lehen lerroan jartzera datoz berriz ere Marasun Landa Sariak, eta hori horrela, hamaseigarrenez zabaldu dute lanak aurkezteko epea.
Errenteria-Oreretari bertako emakumeek egindako ekarpena lehen lerroan jartzera datoz berriz ere Marasun Landa Sariak, eta hori horrela, hamaseigarrenez zabaldu dute lanak aurkezteko epea. Berdintasun Planaren parte den ekintza Errenteriako Udalak antolatzen du Berdintasun Kontseiluaren laguntzarekin, eta bidean altxor ugari azaleratu ditu herriko emakumeen kontaketaren sokak etenik ez dezan izan. Kulturari, hezkuntzari, kirolari, enpleguari… egindako ekarpenak biltzen ari dira lehiaketaren bidez, osatu gabea eta ezinbestekoa den herri kronika osatzeko. Aurten ere bide horretan sakontzen jarraituko dute, eta hori horrela parte hartzera animatu dute antolatzaileek, batez ere emakumeak.
Urtero bezala, honakoan ere bi sari, Emakumezkoen begirada lanik onena, emakume batek edo emakumeek osatutako talde batek egindako lanik onenari saria (500 euroko saria) eta Emakumezkoei begirada lanik onena, gainerako lan guztien artean lanik onena (500 euroko saria). Bi idazlan irabazleen artean gutxienez bat euskaraz aurkeztutako lana izango da.
Bi idazlan irabazleak, gainera, 2026ko Oarso Aldizkarian argitaratuko dira.
Lanak aurkezteko epea hilaren 30ean bukatuko da
Lehiaketaren oinarriak hemen klik eginda ikus daitezke.
Liburu ilustratuaren bigarrena
Mariasun Landa Sarien lehen zortzi ekitaldietan jasotako 23 lanekin Errenteriako emakumeen aztarnak: narrazioak bilduma ilustratua argitaratu zuen udalak 2018an. Orain, bigarren bilduma argitaratzea erabaki du, geroztik jasotako hainbat lanekin. aurrekoan bezala, oraingoan ere Allende Arnaiz eta Idoia Beratarbidek diseinatu dute bilduma, azken horren ilustrazioekin batera. Argitalpenaren aurkezpena hilaren 17an izango da, 12:00etan Emakumeen Etxean.
