Ate irekiak Orereta Ikastolan
2026-27 ikasturterako matrikulazio-kanpaina otsailaren 2tik 13ra izango da zabalik, bereziki, 2023an edo 2024an jaio diren haurrak eskolatzeko. Horrenbestez, Orereta Ikastolak hilaren 20an eta 22an (euskaraz eta gaztelaniaz, hurrenez hurren) egingo ditu ikastola ezagutzeko ate irekien saioak, 17:30ean, Esmalteriako eraikinean.
Orereta Ikastolaren Lino Berria eraikinaren irudi bat. 2026-27 ikasturterako matrikulazio-kanpaina otsailaren 2tik 13ra izango da zabalik, bereziki, 2023an edo 2024an jaio diren haurrak eskolatzeko. Horrenbestez, Orereta Ikastolak hilaren 20an eta 22an (euskaraz eta gaztelaniaz, hurrenez hurren) egingo ditu ikastola ezagutzeko ate irekien saioak, 17:30ean, Esmalteriako eraikinean. Haur Hezkuntzako familiei zuzendutako saioak izango dira. Horrez gain, jada egin daitezke talde txikitako bisitetan parte hartzeko eta bakarkako hitzorduetarako eskaerak webgunean, klikatu hemen. (HH, LH eta DBHko familientzako). Webgunean topatuko ditu hala nahi duenak matrikulazio garaiaren gaineko zein Ikastolari berari buruzko xehetasun gehiago.
Hezkuntza beharretara egokitutako eraikin eraberrituak, etxeko jatorduak, tutoretza- eta orientazio-proiektu sendoak, baso-eskola propioa eta DBHn CAG ikasgelak ditu Orereta Ikastolak, besteak beste.
Orereta Ikastolaren Haur Hezkuntzako proiektu pedagogikoaren oinarriak haurren ongizatea eta konfiantza direla azaldu dute bestalde arduradunek, “haien autonomia, berriz, helburua. Ikasleen beharretatik, nahietatik, gustuetatik, jakin-minetik abiatuta egiten dugu lan; haurrak erdigunean jarrita. Konfiantzaren eta integrazioaren pedagogia abiapuntu, beste zenbait korronte ere kontuan hartuta, haurraren senetik eta erritmotik abiatuta jarduten da: bera da bere bizitzako protagonista, irakaslea bere bidelagun da; haurrak gaitasunez betetako pertsonak direla eta ikasteko berezko gaitasuna dutela sinesten baita”.
Orereta Ikastolaren ezaugarri ardatzak ere zehaztu dituzte, “Euskal Herrikoa, eraldatzailea, komunitarioa eta berdea”. 0-18 urte arteko kalitatezko hezkuntza proiektu propio euskalduna, Euskal Herrikoa, eraldatzailea eta burujabea dela Orereta Ikastolarena adierazi dute, “Euskal Herrian, euskaran zein euskal kulturan oinarritua eta beste hizkuntza nahiz kulturei irekia. Irabazi asmorik gabeko herri onurako kooperatiba izanik, etengabeko hobekuntzaren eta Ikastolako komunitate osoaren elkarlanaren fruitua da; herritik herriarentzat sortua”.
