Korrika batzordeek Korrikaren etorrera prestatuko dute
24. Korrikak Atharratze eta Bilbo lotuko ditu, martxoaren 19tik 29ra. Korrika martxoaren 25eko goizaldean iritsiko da Pasaiara, eta etorrera prestatzeko, Korrika Batzordeak antolatu dituzte lau barrutietan.
Atzo aurkeztu zuten 24. Korrikaren ibilbidea. Euskararen aldeko martxa ibiltari erraldoiak Atharratze (Zuberoa) eta Bilbo lotuko ditu, martxoaren 19tik 29ra bitartean. Pasaiara martxoaren 25ean iritsiko da Korrika, goizeko lehen orduetan. Korrikalariak Donibanera iritsiko dira lehenik, Lezotik. Lezora 06:39an iritsiko da Korrika. Lekukoak Pasaiako badia 07:30ean zeharkatzea aurreikusi dute sustatzaileek, Donibane eta San Pedro motoraz lotzeko. Barruti moretik Trintxerpera iritsiko da, eta Kontadores-Herrera ibilbidea egin ondoren, 08:25ean ailegatuko da Antxora. Antxotarrek oreretarrei emango diete lekukoa, 08:30ean, eta Errenteria-Orereta gurutzatu ondoren, Donostiarako bidea hartuko du Korrikak, Antxo berriro ere zapalduz.
Korrikaren etorrera prestatzeko, Korrika Batzordeak antolatu dituzte lau barrutietan. Hilaren 15ean Donibaneko eta San Pedroko batzordeak egingo dira. Sanjuandarrak Juanba Berasategi aretoan bilduko dira, 18:00etan, eta sanpedrotarrak barrutiko alkateordetzan, 19:00etan. Antxoko zita hilaren 22rako jarri dute, 18:30ean, Txirrita AEKn. Trintxerpeko bilkuraren inguruko informazioa aurrerago zehaztuko dute.
