Pentsatzeko eta hausnartzeko, Iztietako negutegia
Hilabetearen amaiera arte luzatu dute Iztietako kioskoan ezarri duten negutegia. Artetik abiatutako hausnarketa txokoa da hura.
Iztieta auzoko negutegiak badu bidea oraindik. Diputazio Plazako kiosko zaharrean ezarri duten negutegiak, Dejabu Konpainiaren produkzioa denak, urtarrila bukaera arte izango du bertan lekua. Auzo Negutegia izenarekin, hasieran soilik urtarrilaren 8ra arte egon behar zuen, baina epea luzatu egingo dute.
Negutegi poetiko moduan aurkeztu izan dute, eta bertan, gelditzeko, begiratzeko eta hausnartzeko eskaera egin diete bizilagunei. Ikusi ez ezik, parte hartzeko aukera dute bertaratutakoek. Buzoi bat ireki dute bertan, bizilagunek haien hausnarketak, pentsamenduak edota auzoarekiko bizipenak parteka ditzaten. Buzoia urtarrilaren 17ra arte egongo da irekita, eta ondoren, jasotako edukiekin, esku hartze grafiko artistikoa egingo dute. Esku hartze hori urtarrilaren 19tik 31ra egongo da ikusgai.
Energia aktibatzea
Dejabu Konpainiaren helburua auzoko energia aktibatzea eta arte iragankorrak tokiko merkataritzara proiektu berriak eramateko bidea nola prestatzen duen erakustea da. Hainbat urtez utzita egon den kioskoan ezarri dute negutegia, auzoan toki ikonikoa baita. Abenduaren 23an ireki zuten, eta hainbat auzotarrek bisitatu dute askorentzat hain arraroa den leku berria.
