Neguko eta udaberriko programak aktibatu ditu Jabetze Eskolak
Udazkeneko matrikulazioa arrakastatsua izan ondoren, negukoa eta udaberrikoa jarri dira martxan. Hilaren 30a da izena emateko azken eguna.
Irailean Pasaiako Jabetze Eskolako udazkeneko matrikula ireki zen. Emaitza “oso ona” izan zela adierazi du Pasaiako Udalak: ia 250 emakumek eman zuten izena, horietatik 94k lehen aldiz. Orain, neguko eta udaberriko programa jarriko da martxan, eta izena emateko epea berriro zabaldu da.
Jarduera berrien artean, Osasuntsu jan eta zoriontsu bizi ikastaroa antolatuko da berriro Antxon, Tatiana Arzelus Makazagaren eskutik. Jarduera horretan gorputza zaintzeko eta immunitate sistema mantentzeko elikadura praktikak partekatuko dituzte, saio teorikoak eta praktikoak uztartuz. Pepa Bojo Ballesterren gidaritzapean, Autoestimua eta ahalduntzea helduaroan tailerra egingo da San Pedron. Saio horretan ahalduntze prozesuan sentimenduak identifikatu, onartu eta kudeatzeko tresnak landuko dituzte.
Herri askotako Emakumeen Etxeetan aritzen den Eider Zuriarrain Bergarak Biodantza izeneko ikastaroa eskainiko du Antxon. Ibilbide luzea duen Betania Mendoza Cornejo irakasleak, aldiz, Gorputz kartografia feministak ikastaroa emango du Trintxerpen. Saio horretan esperientziak, emozioak, indarkeriak, plazerak eta erresistentziak mapeatzen ikasiko dute ikuspegi feminista eta dekolonialetatik.
Munduko emakumeen literatura berriro eskainiko da, oraingoan Trintxerpen. Hainbat herrialde eta kulturatako emakume idazleen ahots, istorio eta begiradetatik ibilbide bat egingo da, ikuspegi feminista eta kritiko batetik. Horrez gain, Antxoko La Bombonera Arte Eszenikoen Elkarteak Emakumeen ahotsa eta indarra ikastaroa eskainiko du. Ikastaro horrek ahotsa du ardatz, adierazpenerako, identitaterako eta ahalduntzerako tresna gisa. Beatriz Egizabal Ollokiegik, gainera, Clown tailerra emango du. Jolasen eta barrearen bidez, norberaren boterea deskubritzeko espazioa izango da, komedia askapen ekintza bihurtzekoa.
Kirol sailarekin batera, Mendi orientazioa eta martxa taldea sortuko da, jarduera pilotu gisa. Maddi Marquet Ferranek dinamizatutako taldea, eta segurtasun irizpideez, bide marken erabileraz, orientazio printzipioez eta IKT tresnez ikasiko dute barruti guztietan antolatuko diren saio teoriko-praktikoetan. Horrez gain, hiru larunbatetan mendira irteera progresiboak egingo dituzte, Pasaiatik abiatuta, zailtasun maila ezberdinekin.
Azkenik, Emakumeen arteko ongizaterako eta zaintzarako gunearen bidez, elkar laguntza eta emakumeen arteko lotura sustatzeko aukera eskainiko du Emausek.
Urte osoko talde eta guneak
Urte osoko talde eta guneetan parte hartzeko izen emateak berriro zabalduko dira: Jatorri askotariko emakumeen taldea; Indarkeriarik gabeko espazioa: autolaguntza taldea; Ongi zaintzen eta maitatzen ikasteko taldea; Emakumeak korrikalari; eta Jatorri askotariko emakume pasaitarren arteko elkarrizketak.
Izen emateak doakoak eta nahitaezkoak dira, eta adin txikikoen zaintza zerbitzua eskainiko dela jakinarazi du udalak, aldez aurretik eskatuta. Izena emateko epea hilaren 30era arte egongo da zabalik. Informazio oso-osoa eta esku orria udalaren webgunean daude eskuragarri.
