Txoritokietako animalia gorpuzkien kasuan "lidergo falta" egotzi dio PSE-EEk udal gobernuari
Ikerketa "azkar eta zehatza" egin dadila eskatu dute sozialistek "herritarrengan alerta larria" sortu duelako gaiak.
Txoritokietan azaldu diren animalia hondakinena da irudia.PSE-EEk bidalitakoa. San Marko-Txoritokieta inguruan agertu diren animalien gorpuzkien eta hondakinen gaiak “herritarrengan alerta gorria” sortu duela iritzita, horren gaineko ikerketa “azkar eta zehatza” egin dezala eskatu dio Errenteriako PSE-EEk udal gobernuari. Gertakaria herriaren agintean den taldea kritikatzeko ere baliatu dute sozialistek, “lidergo falta” egotzi die. Gaia astearteko (hilaren 20ko) Lurralde Batzordera eraman zutela azaldu dute taldekideek, erreklamazio bidez, udal gobernuak PSE-EEk aurrez egindako informazio eta erantzun eskaerak ez zituela artatu argudiatuta. Udalak gaiaren gaineko azalpenak eman zituen atzo (hilak 21, asteazkena).
Herriko PSE-EEk zehaztu duenez, astearteko eskaera horren harira, udal gobernuak azaldu zien Ingurumen zinegotziak gaiaren gaineko informazioa aurreko egunean (hilaren 19an) izan zuela. “Horrek garbi azaltzen du barne koordinazio arazoa dutela, eta gaien gaineko jarraipen politikoa hutsaren hurrengo dela. Arazoa larria da, herritarrak maiz izaten direlako ingurune natural horretan. Baina larriena honakoa da: gorpuzkiak atzeman zituen herritarra udalera joan zela horren berri ematera, eta ez zuela erantzun politikorik jaso arriskutsua izan daitezkeen isuri horien aurrean”. PSE-EEk esan du “udalaren pasibotasunagatik” erabaki zuela herritar horrek gaiaren berri sare sozialen bidez zabaltzea.
San Marko-Txoritokietako kasua ez dela bakarra izan salatu du PSE-EEk. “Salaketek, oharrek edo idatziek ez dute inolako erantzunik izaten udalaren partetik; horrek etsipena sortzen du, konfiantza eza areagotzen du, eta utzikeria sentsazioa ematen du”. Herritarren arreta ez dela “tramite hutsa” izan behar uste dute sozialistek, eta gaiei ez zaiela eutsi behar “presio mediatikoa” dagoenean: “Horrelakoak gertatzen direnean udal gobernuak lehen lerroan egon behar du, erantzunen lidergoa eraman behar du, lehen unetik azalpenak eman eta beharrezko diren bitartekoak jarrita. Errenteriak hutsik egiten ez duen administrazio bat merezi du”.
