Xaxatzeko prestatzen ari dira
Ereintza Dantza Taldea Azeri Dantza prestatzen ari da, eta parte hartzera deitu ditu herritarrak. Bihar, asteazkena, egingo du lehen entsegua.
Azeri dantzarekin hasi dira Inauteriak. Ate joka dira Inauteriak, eta Ereintza Dantza taldea zurrunbilo betean da prestaketa lanekin. Ardura handia du, bere Azeri Dantzarekin hasten baita mozorro festa Errenteria-Oreretan, eta aurten ere ahalik eta parte hartzaileena izatea nahi du.
Hori horrela, entseguak antolatu ditu azken urteetan bezala, animatzen diren herritarrek oinarrizkoak ikas ditzaten. Otsailaren 12an izango da Azeri Dantza, eta aurretik hiru entsegu antolatu ditu dantza taldeak. Lehena bihar, asteazkena 28, egingo dute 19:00etan Merkatuzarren. Otsailaren 4an eta 11n izango dira beste biak, ordu eta leku berean.
Azeri Dantzan parte hartzeko 18 urtetik gorakoa izan behar da, eta gutxienez entsegu batean parte hartu. Izena eman behar da, gainera, eta horretarako azken eguna otsailaren 9a izango da; online galdetegia bete behar da (klik hemen).
