PSE-EE: "Beharrezko baimenik gabe eta araudia urratuta egin ditu lanak udalak"
Espainiako Kosta eta Itsaso Zuzendaritza Orokorraren eta URA agentziaren ebazpenek bi erresoluzio berritan "baieztatu" dutela azaldu dute sozialistek.
Isaac Palencia, Almudena de La Torre eta Alberto Muñagorrirekin batera PSE-EEren egoitzan. Fanderiako estalki berria baimenik gabe egin zuela udalak, eta egungo araudia urratzen duela baieztatu dutela Costas Espainiako Kosta eta Itsaso Zuzendaritza Orokorraren eta URA agentziaren bi ebazpen berrik adierazi du gaur PSE-EEk. agerraldi bidez egin ditu adierazpen horiek Isaac Palencia sozilaisten bozeramaleak, Almudena de La Torre eta Alberto Muñagorri zinegotziek lagunduta, “hori horrela isuna mantendu dute eta estalkia kentzeko aukera erreala dago, EH Bilduk herritarrei azalpenik eman gabe jarraitzen duen bitartean”.
Bi erakundeen erresoluzioak “gako” dira sozialistentzat, Costasek egina iazko urriaren 10ekoa dela azaldu du, eta URArena, berriz, iazko abenduaren 3koa: “Biek baieztatu dute lanak beharrezkoak diren baimenik gabe egin zirela, eta egungo araudiaren kontra. Honek sozialistok salatu genuen moduan, agerian geratu da kudeaketa txarra izan zela, aurreikuspenik eta zorroztasunik gabekoa”.
Palenciaren hitzetan, Costasen ebazpenak, Fanderian zortasun eremua murrizteko udalak egindako eskaera errefusatu du, “argi utzi du indarrean den mugaketa irmoa dela, Costasen araudia ezargarria dela, eta ez duela marko legala moldatzeko biderik ematen baimenik gabe egindako obra bati estaldura emateko. URAk berriz, zigor espedientea mantendu du eta Fanderiako estalkia baimenik gabe egin zela mantendu du babestutako eremu batean, eta falta larri gisa jo du jarduketa. Horrenbestez, 37.500 euroko isuna eta eremua lehengoratzera derrigortzen du”.
Bi ebazpen horiekin bide administratiboa itxitzat ematen dela gaineratu du Palenciak, “epaitegietara jo dezake udalak, eta prudentziaz hitz egin behar dugu, baina eremu horretan estalkia erretiratzeak ondorio ekonomiko eta sozialak izango lituzke, baita kirolaren gainekoak ere. Ez gara hipotesiez ari, ezta abisuez ere, oso argiak diren ebazpen administratiboez ari gara”.
Gardentasun falta egotzi dio Palenciak “EH Bilduren gobernuari”, ez plenoari, ezta herritarrei ere ez informatu izana egotzi dio, eta azalpen publikoak ematea exijitu dio, “uste dugu gainera ardura politikoez hitz egiten hasteko garaia heldu dela; bateren batek hartu beharko du bere gain honen ardura”. Gaia “eztabaida publikora” eramaten jarraituko duela esan du azkenik, “herritarrek ahaztu ez dezaten, diru publikoa, sinisgarritasun instituzionala eta Errenteriarentzat ezinbestekoa den azpiegitura bat daudelako jokoan”.
