Astelehenean hasiko dira Altamirako saneamendu sistema berritzeko lanak
Auzoa eraiki zenetik euri urak eta ur zikinak bereizi gabe isurtzen dira badiara, eta horri irtenbidea emateko dira obrak.
Astelehenean (otsailaren 2an) hasiko da Altamira auzoko saneamendu sistema berritzeko lanen bigarren fasea, Lezoko Udalak eta Añarbeko Uren Mankomunitateak ekainean sinatu zuten hitzarmenaren barrukoa. Auzoa eraiki zenetik euri urak eta ur zikinak bereizi gabe isurtzen dira badiara, eta horri irtenbidea emateko dira obrak. “Oinarritik konpondu beharreko sistema zen, ezinbestekoa herriaren eta ingurumenaren zaintza bermatzeko”, adierazi du udalak. Laka eginda, Loiolako araztegira bideratuko dira ur horiek.
Lanek eragozpenak sortuko dituzte auzoan, bai ibilgailuen aparkaleku plazetan zein zirkulazioan. Behean ikus daiteke aldaketen edo kale itxien zerrenda. Auzotarrek edozein zalantza badute Udaltzaingoaren 943 52 46 50 telefono zenbakira dei dezakete. Lanek sor ditzaketen eragozpenengatik ulermena eskatu die udalak altamirarrei.
Altamirako lanak. Eraginak.
- Tomas Garbizu kalea itxita egongo da goranzko norabidean.
- Beheranzko norabidea erabilgarri egongo da bi zentzuetan, semaforo bidez erregulatuta.
- Tomas Garbizu kalearen goranzko norabidean ezingo da aparkatu (itxita egongo da eta).
- Auzoko gainontzeko kaleetan, aparkalekuak egoiliarrentzat soilik egongo dira erabilgarri. Gainera, Altzate igerilekuko aparkalekuko eskuin aldeko ilaran ere egoiliarrek bakarrik aparkatu ahal izango dute. Bi kasuetan, egun eta gau osoan zehar eta obrak amaitu arte egongo dira aparkaleku horiek bertakoentzat erreserbatuta.
- Eragindako eremuetan kartel bidez adierazita egongo da aparkalekuetan bertakoen lehentasuna.
