Emakume zientzialariena da Xenpelar Etxea
Erakusketa zabaldu dute Emakumeak zientzian egitasmoaren hamargarren ekitaldiaren testuinguruan. Azken hori otsailaren 11n ospatzen den Zientziako Emakume eta Nesken Nazioarteko Eguna dela eta antolatzen dute urtero.
Emakumeak Zientzian egitasmoaren hamargarren ekitaldia egiten ari dira aurten. Zientzia emakumeen ikuspegitik: begi hutsez ikusten ez dena. CIC biomaGUNEko emakume ikertzaileek egindako irudi zientifikoak erakusketa gaur zabalduko dute Xenpelar Etxean, eta hilaren 14ra arte izango da hura bisitatzeko aukera. CIC biomaGUNEk antolatu du, Emakumeak zientzian egitasmoaren hamargarren ekitaldiaren testuinguruan. Azken hori otsailaren 11n ospatzen den Zientziako Emakume eta Nesken Nazioarteko Eguna dela eta antolatzen dute urtero.
Erakusketak emakume ikertzaileek egindako mikroskopia bidezko irudi zientifikoak biltzen ditu, helburu argi batekin: zientzia gizartera hurbiltzea, ikuspegi artistiko eta bisual baten bidez. Irudi guztiak CIC biomaGUNEko ikertzaileek egindakoak dira, zehazki, Donostiako Parke Teknologikoan kokatutako biomaterialen arloko ikerketa zentroan lan egiten duten edo lan egin duten emakume zientzialariek sortuak.
Ikertzaileek aztertzen dituzten objektuen antzera, emakume zientzialarien lana ez da beti begi hutsez ikusten, eta beharrezkoa da horrenbestez haien ekarpena ikusgarri egingo duten espazioak sortzea. Erakusketak, ikerketa zientifikoa, sormena eta berdintasuna uztartzen ditu, emakumeek zientzian duten funtsezko eginkizuna aitortuz.
Erakusketa hilaren 14ra arte izango da zabalik, astelehenetik larunbatera, 17:00etatik 20:00etara. Bisita gidatua eskainiko dute gainera, hilaren 10ean, 18:00etan.
