Gobernantza onaren ELoGE zigilua jaso du Errenteriako Udalak
Udal kudeaketa publikoaren kalitatea, gardentasuna eta herritarren parte hartzea aitortzen ditu nazioarteko aintzatespen horrek.
ELoGE Zigilua jasotzeko unean Aizpea Otaegi alkatea.Herri Bizia Europako kontseiluak sustatutako ELoGE Gobernantza Bikaintasunaren Europako Zigilua eskuratu du Errenteriako Udalak. Udal kudeaketa publikoaren kalitatea, gardentasuna eta herritarren parte hartzea aitortzen ditu nazioarteko aintzatespen horrek. EUDELek koordinatutako seigarren ekitaldiaren barruan jaso du zigilua udalerriak, gobernu onaren hamabi printzipio europarretan oinarritutako ebaluazio zorrotz baten ondoren; iazko irailetik aurrera egin dute autoebalazio prozesu hori hautagai izan diren udalerriek, hautetsiei, langile publikoei eta herritarrei zuzendutako inkesten laguntzaz.
Prozesu horrek udal bakoitzerako hobekuntza plan zehatza definitzeko balio izan du.
Zigiluen banaketa ekitaldian, balorazio prozesuak berak eskaintzen duen hausnarketarako aukerari jarri dio fokua Aizpea Otaegi alkateak.Herrikideen eta elkarrekin osatzen duten komunitatearen zerbitzura egon behar dutela argi dutela adierazi du alkateak, eta horrek etengabeko hobekuntza eskatzen duela, “inoiz guztiz eskuratzen ez den bikaintasunaren alde etengabe lan egitea”. Aitortzak balio “berezia” dituela ere adierazi du udal agintariak, “parametro estandar eta konparatiboetan bide onean goazela erakusten digutelako, baina batez ere balorazio prozesuak berak ematen digun hausnarketarako aukeragatik”.
Ebaluazioan. besteak beste, segurtasun juridikoen eta herritarren parte hartzearen arloak izan dira oso baloratuak. Lehenengoarekin lotuta, gardentasuna, kontu ematea eta administrazio prozeduren segurtasun juridikoa bermatzeko neurriak nabarmendu dituzte. Bigarrenean, udalak urteotan garatutako parte hartze prozesu egiturek, auzoetako espazio egonkorrek, aurrekontu parte hartzaileek, eta metodologia inklusiboek udal kudeaketaren kalitate demokratikoa indartu dute.
Aitortza bai, baina hobekuntzarako tresna praktikoa ere badela ELoGE gaineratu du Otaegik, “udal politikak eta zerbitzu publikoak hobetzea helburu duena”.
Errenteriako Udalarekin batera, Bilbokoak, Leioakoak, eta Urretxukoak jaso dute aitortza hori. Gainera, Tolosak gobernu onaren printzipio europarrekiko konpromisoa berretsi du. Seigarren ekitaldiarekin Araba, Bizkai eta Gipuzkoako 25 udalerrik hartu dute parte ELoGE prozesuan, eta 16 euskal udalerri daude Europako Kontseiluaren gobernantza bikainen sarean. Errenteria-Orereta da horietako bat.
EUDELen Bilboko egoitzan egin da aitorpenen banaketa gaur.
