Gorbeiako Parke Naturalera joango da Itsastarrak
Trintxerpeko mendi taldeak eta Herrerako Mendizaleek Itxinako mendiguneko ibilbidea egingo dute hilaren 15ean.
Trintxerpeko Itsastarrak Mendi Taldea eta Herrerako Mendizaleak Gorbeiako Parke Naturalera (Bizkaia) joango dira hilaren 15ean (igandea), Itxinako mendiguneko ibilbidea egiteko. Mendizaleak 07:00etan irtengo dira Trintxerpeko kaitik, eta 07:05ean Garberan eta 07:10ean Pio XIIn geldialdiak egingo dituzte, jendea jasotzeko. Bazkideek 20 euro ordaindu beharko dituzte parte hartzeko; bazkide ez direnen prezioa, aldiz, 22 eurokoa izango da. Izen emateak galdetegi bidez egin behar dira.
Mendizaleek bi ibilbide proposatu dituzte: 12,3 kilometrokoa 1.000 metroko desnibel positiboarekin eta 10,9koa, 800 metroko desnibelarekin. Bi ibilbideak Orozkoko Urgoiti auzotik abiatuko dira, eta bertatik Itxinako mendigunera joko dute. Itxina Gorbeiako Parke Naturalaren barruan dagoen mazizo karstikoa da. Naturak inguru horretako kareharriak higatu ditu milioika urtez, leizeak, kobazuloak eta lapiazak sortuz. Horien artean Superlegor haitzuloa nabarmendu dute mendizaleek, eta txoko hori bisitatuko dute.
Bertatik Lexardiko bordetarantz joango dira, eta geldialdia egingo dute bazkaltzeko eta indarrak hartzeko. Sabelak bete ondoren, Igelarantz Pasabidera joango dira, eta bi ibilbideak banandu egingo dira. Ibilbide luzekoek Lekanda mendia (1.314 metro) igoko dute. Tontorra konkistatu eta gero, Arrabako zelaietara jaitsiko dira, Pagomakurreko piknik gunean bukatzeko. Ibilbide motzekoak, aldiz, zuzenean jaitsiko dira Arrabako zelaietara, Pagomakurren bukatzeko.
