Inauterietarako prest dira
Kaldereroek bihar helduko dira Errenteria-Oreretara Inauterien iragarle eta hilaren 17an bukatuko da mozorro festa, sardinaren ehorzketarekin.
Inauterietako batzordeak atzo aurkeztu zuen mozorro festaren harira antolatutako egitaraua.Herri Bizia Prest dute guztia, hala jakinarazi zuen atzo inauterietako batzordea osatzen duten norbanako eta eragileek egindako agerraldian. Tim Burton izango da aurtengo gaia, eta horren bueltan egitarau anitz, inklusibo eta gozagarria diseinatu du batzordeak. Azken horrek, oso positibotzat jo du herritarrek mozorro festekiko azaldutako interesa, “horren adierazgarri, eragile batzuk batu dira batzordera eta horrek lanaren sendotzea eta ekarpen zein ikuspegi aniztasun handiagoa ekarri du”.
Bihar, ostirala, hasiko da jai egitaraua Kaldereroekin. Bukatu berriz, hilaren 17an egingo du programazioak, sardinaren ehorzketarekin. Tartean, Tim Burtonen unibertsoan murgilduko da udalerria eta herritarrak. Urteroko ekintzek ez dute hutsik egingo, eta udaletxeko arkupetan jartzen duten photocalla eskura izango dute kuadrilla eta familiek. Herri bazkaria ere hitzordu saihestezina izango da aurten, “txartelak joan den larunbatean salgai jarri eta minutu gutxian agortu ziren”.
Hilaren 12an Herriko Plazan lehertuko da festa 19:45ean Asteme, Oilarqueen eta Katukoren eskutik. Ondoren Azeri Dantzak hartuko du lekukoa, eta hura bukatuta, 20:30ean konpartsen aurkezpena izango da Lekuona Fabrikan. Hori bertatik bertara ikusi nahi dutenek sarrera erosi beharko dute —larunbatean, hilak 7 jarriko dira salgai, 12:00etan— euro batean. Lekuona Fabrikan edo online erosi ahalko dira (klik hemen).
Pantaila handia gustuko dutenek Niessen Kulturgunera joateko aukera izango dute, emanaldia zuzenean ikusteko. Horretarako gonbidapena eskuratu beharko da (klik hemen). Gainera, emanaldia streaming bidez ere emango dute .
Programa osoa, berriz, datozen egunetan egongo da eskura udal eraikinetan, turismo bulegoan, eta Herri Bizia webgunean.
Webgune horretan bertan inauterietako egitarauaren barruan antolatutakoen gaineko argazki galeriak argitaratuko dituzte egunero.
