'Bi baso bat ur' antzezlana estreinatuko du Metrokoadrokak
Hilaren 19an Galdakaon estreinatuko dute lana, baina Oarsoaldean ere izango da ikusteko aukera; lehen data Errenterian izango da, martxoaren 1ean.
Metrokoadrokak 'Bi baso bat ur' antzezlana aurkeztuko du. Mendi Urruzuno Metrokoadroka kolektiboak Bi baso bat ur antzezlana estreinatuko du hilaren 19an, 19:00etan, Galdakaoko Torrezabal antzokian. Udalbiltzaren Geuretik Sortuak programaren barruan ondutako proiektua da, eta Bizkaiko oholtzatik igaro ondotik Euskal Herri osoan zehar ariko dira, baita Errenterian, Lezon, Irunen eta Oiartzunen ere.
Antzezlan honek tratu txarrei loturiko trauma baten ostean alaitasunak eta umoreak jokatzen duten paperaz egiten du gogoeta, eta horretarako honakoak igoko dira agertokira: Intza Alkain, Iraia Elias, Javier Barandiaran eta Marina Suarez. Zuzendaritza lanez Edurne Azkarate eta Oier Guillan arduratu dira, eta dramaturgia arduradun Guillan eta Miren Azkarate izan dira talde osoarekin elkarlanean.
Sortzaileek aurreratu dute antzezlan horrek alaitasunaren izaera soziala jarri nahi duela erdigunean “minaren ostean alaitasunaren eta umorearen jabe egitea mina gainditzeko eta ahalduntzerako ezinbesteko tresna dela agerian utziz”. Hartara, antzezlan honek gorputzeko minei erreparatuko die alaitasunaren zentzu soziala arakatzeko.
Informazio gehiagorako, egin klik hemen.
Oarso Bidasoko datak
- Errenteria – Orereta
- Martxoak 1, 19:00, Niessen.
- Lezo
- Apirilak 19.
- Irun
- Apirilak 24.
- Oiartzun
- Urriak 25, Landetxe.
